فتة العدس نوع من انواع الفتة اللذيذة يا رب تعجبكم
دى فتة عدس بالخل والثوم مع شوربة العدس وقطع لحمة مسلوقة
طريقة التحضير والإعداد
انا هنا جبت اللحمة وغسلتها كويس وحطيتها فى حلة الضغط طبعا ممكن اى حلة عادية علشان نسلقها ونحط معاها بصلة صغيرة وورق لورة وحبهان وملح وفصين مستكة ونغطيها بالماء
ونغطى الحلة كويس ونسيبها تستوى طبعا فى حلة الضغط بس ساعة الاربع ما بتاخد وقت
وهنا بعمل العدس نجيب ربع كيلو عدس او نصف كيلو الكمية حسب الرغبة ونغسلة كويس فى المصفاة ونقطع معاة بصلة كبيرة وجزرة كبيرة و2فص ثوم وحبة طماطم وحبةبطاطس صغيرة ومكعب مرقة كلة على بعض ونغطية بالماء ونتركة يستوى كويس وبعدين نضربة فى الخلاط وطبعا نضيف ملح وفلفل وكمون حسب المذاق ونعمل لة تقلية عبارة عن معلقة سمنة وفص ثوم مفروم ونطشها علية وممكن نستغنى عن الثوم لانى حطيت ثوم فى الاول ممكن نكتفى بالسمنة بس تكون مقدوحة كدة بتكون الشوربة جاهزة
هنا انا بعمل رز مصرى ابيض عادى خالص يا دوب معلقة سمنة بسيبها تسخن شوية وبعدين اكون غسلة الرز كويس احطة مع معيلر الماء وملح ونتركة يستوى على نار هادئة
هنا بجهز العيش علشان الفتة انا بعملها بالعيش الشامى او اى نوع تانى بس مايكون سميك بقطعة الى مكعبات
يصبح بهذا الشكل
ونحط علية فصين ثوم مفرومين ومعلقة سمن او زبدة وممكن نحطة فى صينية فى الفرن علشان نحمصة او زى ما انا عملت على البوتجاز عادى خالص مع التقليب
ولما يتحمص نضيف معلقة خل وشوية شوربة عدس بالشكل دة ونسيبة يصفى شوية
دى صورة كاملة لكل المكونات بعد ما استوت واصبحت جاهزة للتطبيق والغرف فى اطباق التقديم
هنا الرز الابيض واللحمة وشوربة العدس والعيش بالخل والثوم
طبعا ممكن نحمر اللحمة وممكن نسيبها مسلوقة حسب الرغبة هنا دة الشكل النهائى نجيب طبق ونحط طبقة من العيش ثم طبقة من الرز واللحمة فى المنتصف ويقدم بجانبة شوربة العدس الطبق دة لشخص واحد وممكن نعملة كلة فى طبق كبير وكل واحد يغرف حسب الكمية اللى عايزها وبألف هنا
** منوس ننوس **
(منى عبد المنعم)
تعليقات
إرسال تعليق