طريقة عمل شوكليت كيك كنتاكى بالصور من مطبخ منوس

دة شوكليت كيك بالضبط نفس طعم اللى بيتباع فى كنتاكى جربوة سهل جدا وطعمة رائع ان شاء الله يعجبكم 

المقادير والمكونات

كوب حليب +2 بيضة +فانيليا + عصرة ليمون +نصف كوب زيت +كوب سكر عادى +2كوب دقيق + نصف كوب كاكاو خام +معلقة كبيرة باكينج بودر +معلقة صغيرة باكينج صودا 

طريقة التحضير من اسهل ما يكون

نضع المقادير الجافة فى وعاء والمقادير السائلة فى وعاء اخر ونخلط كويس 

ثم نقلب المقادير السائلة على المقادير الجافة فى وعاء واحد ونقلب كويس بمضرب يدوى عادى ودة شكل الخليط

هنا نبطن صينة فرن مقاس 26 بورق زبدة او زبدة ودقيق ومن الجوانب كمان

نصب الخليط وندخلة فرن حار لمدة من نصف ساعة الى 40 دقيقة

ودة شكلها اول ما تطلع من الفرن ممكن نعتمد الوصفة دى كتورتة طعمها فوق الوصف اللى اكل شوكلت كيك كنتاكى بالضبط نفس الطعم اهم حاجة نستخدم كاكاو فاخر وغامق

هنا انا شيلت الجزلء اللى فوق شوية علشان اخليها مستوية وقسمتها 3 بس استعملت 2 فقط والطبقة التالتة هاعمل بيها وصفة تانية بس عادى ممكن نقسمها 2 فقط وشايفين المسام روعة ومفتحة جدا 

دة الجزء اللى انا شيلتة من فوق قطعتة عشوائى كدة ومش هارمية بشيلة فى كيس فى الفريزر اعمل بية ترايفل كاسات زى اللى كنت منزلاة انهاردة 

هنا نسيب الكيكة تبرد خالص خالص ونحضر كريم شانتى مضاف الية بودرة كاكاو ونخفقة بالحليب المبرد نعمل كمية كريمة كويسة حوالى ربع كيلو بودرة كريمة ونضع نصفها فى المنتصف

ونفردها بهذا الشكل

ثم نصع طبقة الكيك التانية ثم باقى الكريمة ونغلفها كويس جدا من جميع الجوانب ومن فوق وكل ما كانت الكريمة اكتر تكون احلى كتير ونساوى الجوانب بالشكل اللى فى الصورة ونحطها فى التلاجة نصف ساعة تبرد كويس.

ونكون محضرين صوص جناش بس هنا انا عملتة بطريقة مختلفة شوية سيحت شيكولاتة خام وضفت لها بعد ما ساحت لبن مكثف محلى نسلة اضيف نقاط واخلط لغاية ما تتكون صلصلة ولو حسينا انها تقيلة قوى نضيف نقاط من الحليب العادى ونتركها شوية فى التلاجة 

ونطلع الكيك والصوص من الافضل نضع الكيك على شبكة ومن تحتها صينية بس للاسف انا معنديش شبكة نصب الصوص فى المنتصف وهوة بينزل لوحدة على الجوانب وممكن الزيادة اللى تنزل ناخدها ونحطها تانى على الكيك وبعدين نحطها على طبق نظيف وندخلها التلاجة تتماسك كويس 

ونقطعها مثلثات بهذا الشكل وتقدم بالف هنا والله ولادى وجوزى وماما قالولى نفس الطعم بالضبط رائعة بجد ومش مكلفة من كنتاكى المثلث الواحد ب11 جنية كدة اوفر كتير واحلى بجد بس كل ما استعملنا كاكاو ممتاز كل ما كانت النتيجة احلى والطعم افخم