طريقة عمل كيك الأناناس بالصور والخطوات من مطبخ منوس ننوس

هنا انا جبت قالب فرن مربع وبطنتة بورق زبدة من جميع الجوانب باكملة يعنى ودهنت الورقة زبدة ورشيت سكر بنى هوة دة اللى هايعمل طعم الكراميل

وفى طريقة كمان للكراميل لو مش متوفر السكر البنى

تحطى على النار كوباية سكر وعليهاربع كوب ماء ونسيبها شوية تاخد لون ذهبى اول الكراميل بس تكون سائلة وفاتحة نصبها مباشرة فى صينية الكيك بدون ورق زبدة وترصى الاناناس وبعدين تصبى الكيك عادى وبشرط اول ما تطلع الكيكة تقلبيها على طووووول 

دة كمبوت الاناناس نصفية كويس من الشربات بتاعة ونرصة فى الصينية باى شكل نحبة

هنا نبدا فى تحضير الكيك وهوة عبارة عن كيك اسفنجى

 المقادير

كوب سكر بودرة ناعم وكوب دقيق وكوب بيض على حسب ما ياخد الكوب معاكى وفانيليا وعصير نصف ليمونة ومعلقة صغيرة باكينج بودر وربع معلقة صغيرة ملح ومعلقة كبيرة ماء مغلى 

الاول نخفق البيض مع السكر والماء والليمون والفانيليا

نستمر فى الخفق مدة حتى يبيض الخليط ويتضاعف بهذا الشكل

ننخل الدقيق مع البودر والملح ونضيفة بخفة ونقلب بخفة من تحت لفوق علشان نحتفظ بكمية الهواء 

نصبة فوق الاناناس وندخلها الفرن لمدة من نصف ساعة الى ساعة الاربع

ودة شكلها اول ما تخرج لازم نشيلها على طول من الصينية ونقلبها علشان السكر ما يتجمد

ودة شكلها من الجنب بعد ما قلبتها 

ودة الشكل النهائى وتقدم بالهنا طعمها مميز وخفيفة جدا والسكر البنى خلى طعمها رائع