طريقة عمل بيتزا بحشوات مختلفة ومتنوعة بالصور من مطبخ منوس ننوس

المقادير

3كوب دقيق +2معلقة كبيرة خميرة فورية +كوب وربع حليب دافئ للعجن +معلقة صغيرة سكر +3معلقة كبيرة حليب بودرة نيدو +معلقة صغيرة ملح +معلقة صغيرة زعتر مجفف +3 معلقة كبيرة زيت الطريقة 

طريقة التحضير

الاول نضيف كل المكونات الجافة مع بعض ونخلط ثم الزيت ونفركة فى الدقيق 

ثم نضيف الحليب الدافئ ولو احتاجت العجينة رشة دقيق كمان علشان نضبط العجينة نضيف مفيش مشكلة الى ان تتكون عجينة متماسكة وطرية فى نفس الوقت

الكمية دى تعمل 2صينية بيتزا حجم كبير او 3 وسط انا بفضل نقسم العجينة الى كورتين ونغطيها بالنايلون ونتركها تختمر
نرش رشة دقيق على الرخامة وناخد كرة

ونفردها بالسمك اللى احنا عايزينة بالنشابة ونحاول نخليها دائرية على حجم الصينية انا بخليها رفيعة لانها لسة هاتعلى شوية فى الفرن

نشيلها ونحطها فى الصينية مدهونة قليل من الزيت ونضغط باصابعنا من الاطراف علشان نعمل فيها شكل جميل 

وبعدين الزيادة نقصها بسكينة البيتزا ونساوى الاطراف 

دة شكلها بعد ما ساوينا الاطراف

هنا دى تشكيلة من المكونات حسب الرغبة سوسيس شرائح مستوى وقطع فراخ وزيتون حلقات وفلفل اخضر مكعبات وسلامى ورستو مدخن وطبعا جبنة موزاريلا وكاتشب انا هنا جبت مكونات كتير لانى عملت اربع بيتزات كانت للغذاءعملت واحدة بالفراخ وواحدة بالرستو المخن وواحدة بالسوسيس وواحدة بالسلامى وكل واحد ياكل اى يحب طبعا مش لازم كل دة ممكن صنف واحد او حسب الرغبة

نبدا نضيف المكونات الاول رشة صغيرة من الجبنة علشان المكونات تمسك فيها هنا انا عملتها بقطع الفراخ الاستربس طبعا اى حاجة نحطها على البيتزا تكون مستوية قبل ما نحطها على البيتزا لان البيتزا مش بتاخد وقت فى الفرن وبعدين الزيتون والفلفل واى مكون نحبة 

وهنا دى بالسلامى والسوسيس 

وبعدين نحط تانى جبنة كتير بالشكل دة وكاتشب وندخلها الفرن انا بحب اعملها بالكاتشب وممكن زى ما تحبوا بصوص الطماطم بالثوم حسب الرغبة 

وهنا بعد ما انتهيت من اضافة كل المكونات طبعا لازم اخر حاجة تكون الجبنة الموزاريلا والكاتشب نسيبها خمس دقايق كدة ترتفع شوية تانى و نحطها فى الفرن ويكون الفرن حامى

ودة شكلها بعد ما استوت بالهنا تقطع مثلثات وتقدم ساخنة

يارب تعجبكم بالهناء

***منوس ننوس***

(منى عبد المنعم)