طريقة عمل كفتة الرز بصوص الطماطم من مطبخ منوس

طريقة التحضير

دول حواى 400 جرام لحمة مفرومة حمراء خالص مافيهاش اى دهون ودة شرط اساسى لنجاح كفتة الرز عليهم 100 جرام رز مطحون ناعم(فى ناس بتحط نفس كمية اللحمة رز لكن انا بحبها كدة ) عليهم بصلة متوسطة و4 فصوص ثوم وكزبرة وبقدونس وشبت مفرومين ناعم وطبعا ملح وفلفل اسمر 

فى الكبة نضع البصل والثوم والخضرة والرز ولو مش متوفرة الكبة ممكن نخلط كل المكونات ونفرمها فى الفرمة مرتين مثلا 

ونخلط الى ان يصبح ناعم بهذا الشكل 

نضيف اللحم المفروم والتوابل ونخلط كويس جدا لازم نستمر فى الخلط الى ان تتكون عجينة متجانسة

بهذا الشكل بتشبط بسيط فى اليد ندهن ايدينا زيت بسيط ونشكلها الى اصابع صغيرة 

بهذا الشكل الى ان تنتهى الكمية 

هنا نقلى اصابع الكفتة فى زيت غزير 

ودة شكلها بعد القلى لازم ننشفها شوية بالشكل دة وممكن فى المرحلة دى نفرزها فى اكياس ونستخدمها عندالحاجة 

هنا انا حضرت صوص الطماطم هوة المفروض يتعمل بثوم بس انا اكتفيت بالثوم اللى فى الكفتة علشان ما تكنش حامية 

عبارة عن طماطم مضروبة فى الخلاط مع صلصة ومعلقة كبيرة سمنة وتترك حتى تتسبك بالشكل دة

ولما تتسبك نضيف ليها كمية من الماء والملح والفلفل الاسمر ونتركها تغلى 

واول ما تغلى نسقط الكفتة فيها على طول ونتركها تستوى وتتسبك شوية 

ودة شكلها النهائى وبالهنا انا بحبها تقيلة شوية لكن لو تحبوا تسيبوها خفيفة شوية مفيش مشكلة حسب الرغبة وتقدم بالهنا مع ارز ابيض مصرى

**منوس ننوس**

(منى عبد المنعم )