بناء على اسئله المتابعين المتكررة عن
أنواع الكريمة اللبانى
وايه الفرق بين الانواع
انا هنا هاوضح لحضراتكم الفرق
زى ما احنا شايفين فى الصورة دة نوع الكريمة اللبانى المتوفرة فى الغالب فى مصر وهى بتكون فى عبوات كرتون زى الحليب دى ماركة جهينة وهى متوفرة بثلاث احجام ربع كيلو ونصف كيلو وكيلو واوقات بيكون موجود كمان ماركة بيتى
طبعا الكريمة اللبانى فية منها نوعين
نوع خاص بالطبخ ونوع خاص بالحلويات
هنا دة النوع الخاص بالطبخ
وزى ما احنا ملاحظين في جهة مكتوب عليها بالعربى وجهة بالانجلش
والنوع دة بيطلق علية كريمة طهى او كوكينج كريم والاسمين بيندرجوا تحت مسمى كريمة لبانى النوع دة خاص بالطبخ ولا يمكن استعمالة فى الحلويات
اما النوع الاخر الخاص بالحلويات
فهو يسمى كريمة خفق او ويبنج كريم وكذلك الاسمين بيدخلوا تحت اسم كريمة لبانى والنوع دة ممكن يستخدم فى الحالة السائلة كما هوة لعمل صوصات مختلفة مثل صوص التوفى او الكراميل الخاص بالسينامون او صوص الجناش وممكن يخفق مع اى منكهات ويصبح بديل للكريم شانتى وايضا فى حال عدم توفر كريمة الطبخ ممكن نستعمل كريمة الحلويات فى الطبخ ولكن لا يمكن العكس
يارب اكون قدرت اوضح الفرق والمسميات المختلفة لحضراتكم وان شاء الله تستفيدوا ولا تنسونى بصالح دعائكم
مع تحياتى
**منوس ننوس**
(منى عبد المنعم)
تعليقات
إرسال تعليق