عمل فتة الشاورما بالصور والخطوات بطريقة الشيف منى عبد المنعم

دى فتة بقطع الخبز المحمص ممكن تتعمل بشاورما اللحم او الدجاج انا هنا عملتها باللحم يارب تعجبكم طعمها جميل بصراحة ومختلف

طريقة التحضير

هنا الاول هنحضر الشاورما

وهنحتاج الى شرائح من اللحم الاستيك وهنتبلها من قبلها بيوم بتشكيلة من البهارات (ملح وفلفل وبابريكا وجنزبيل وجوزة الطيب وبهار لحم وسماق وبصل وثوم بودرة لو متوفر) وممكن اى بهارات تحبوها ومعلقتين زيت وندعكهم كلهم باليد كويس ونغطيها ونحطها فى التلاجة من الليل للصبح

وبعدين نضع معلقة سمن فى طاسة ونعلى النار جدا ونشوح الشرائح بالشكل دة

ودة شكلها بعد التشويح

هنا نبدا نقطعها شرائح رقيقة جدا بهذا الشكل ونضعها فى صينية فرن ولو فى اى صوص من التحمير يضاف عليها مع نصف كوب ماء وتوضع فى الفرن تحت الشواية بس نخفض مستوى الصينية يعنى نخليها على الرف تحت خالص وكل خمس دقائق كدة نقلبها لغاية ما تحمر وتستوى

ودة شكلها بعد ما استوت

هنا المرحلة التانية 

تحضير الرز نحضر حلة ونضع فيها نعلقة كبيرة زيت ونشوح فيها (بصلة كبيرة مقطعة وحبة واحدة طماطم مكعبات ومعلقة بهارات لحم واعواد قرفة وحبهان وقرنفل)

الى ان يصبحوا بهذا الشكل

نضيف عليهم كمية من الماء ومكعب مرقة ونتركهم يغلو خمس الى عشر دقائق ثم نصفى الخليط دة

ونكون غسلين رز مصرى عادى الكمية حسب الرغبة مثلا 2كوب رز نضع عليهم 2كوب مرق بهذا الشكل ونضع ملح وفلفل اسمر ونتركة يستوى

هنا دى مكونات الفتة اللحم شاورما ونحتاج الى خبز محمص وحمص مسلوق جيدا والرز ونحتاج الى صوص ثومية او صوص طحينة عبارة عن ( طحينة بيضاء وليمون وملح وكمون وخل وفص ثوم وماء ) طبعا الاول بنفك الطحينة بالماء نقطة نقطة لغاية ما نوصل للسمك اللى احنا عاوزينة ونحط باقى المكونات ونخلط

هنا الطبق دة بالطحينة 

وهنا نطبق الشكل النهائى للفتة ممكن فى اطباق فردية وممكن فى طبق واحد حسب الرغبة نضع طبقة من الخبز ثم رشة طحينة ثم طبقة من الرز ثم الحمص ثم الشاورما ونرش طحينة وتقدم بالهنا

وممكن بالشكل دة بدل الطحينة ثومية ويزين باللوز المحمص والزبيب حسب الرغبة طعمة رائع جدا

** منوس ننوس **

(منى عبد المنعم)