طريقة عمل المحشى المشكل بالصور والخطوات من مطبخ منوس

دى طريقة عمل محشى كوسة وباذنجان وفلفل وطماطم بطريقة سهلة

طريقة التحضير

نضع فى وعاء الخلاط نقطع بصلة كبيرة مع 2 فص ثوم مع كمية من الطماطم الطازة ومعلقة كبيرة معجون طماطم وماء ونخلط جيدا الى ان نحصل على صوص طماطم

نحضر صينية او حلة حسب الرغبة ونضع فيها معلقة كبيرة سمنة او زبدة مع معلقة كبيرة زيت وممكن سمنة بس او زيت بس حسب الرغبة ونسيبها تسخن شوية وبعدين نصب عليها صوص الطماطم ونتركها تتسبك

هنا نكون مجهزين الكوسة والفلفل والباذنجان طبعا نقورهم من الداخل وبعدين نغسلهم كويس ونحطهم فى مصفاه

هنا الصوص اتسبك كنت غاسلة الرز ونقعها لازم رز المحشى يتنقع وطبعا كمية من الخضرة ( بقدونس كسبرة شبت ) مغسولين ومقطعين صغير ونحط التوابل فلفل اسمر وملح وكزبرة ناشفة فى ناس بتحب تحط نعناع جاف بس انا مش بفضله فى الاكل لكن طبعا حسب رغبتكم

نقلب الخلطة كلها كويس على بعض بالشكل دة

ونمسك الكوسة ونبدا نحشيها ونسيب ربعها بدون حشو علشان سواء الرز بالشكل دة

نحضر حلة كبيرة تكفى الكمية ونضع فى الارضية شرائح طماطم ونتبلها بالملح والفلفل وممكن كمان نحط قلب الكوسة الاول وفوقها شرائح الطماطم وانا بحب اوقف المحشى بالشكل دة بيكون اسهل فى السواء

وهكذا الى ان تنتهى الكمية 

نكون مجهزين ماء مغلى وعلية 2 مكعب مرقة دجاج ونصب الماء على المحشى ونتركة يغلى ولما يوصل الماء الى النصف نخفض النار ونتركة يستوى على الهادى

ودة شكلة النهائى وبالهنا

** منوس ننوس **

(منى عبد المنعم)