بطاطس ساندويتش باللحمة المفرومة بالصور والخطوات من مطبخ الشيف منى عبد المنعم

أكلة مناسبة للحفلات او كنوع من المقبلات

دى نوع بطاطس محشية لحم مفروم بالبقدونس بتكون على شكل ساندوتش

طريقة العمل والتحضير

نحضر حوالى 4 حبات بطاطس كبيرة والى حد ما طويلة ومنتظمة تقشر وتغسل جيدا

ثم نبدأ فى تقطيعها نقطع شريحة رفيعة بس لا ننزل بيها للاخر الى المنتصف تقريبا زى الصورة كدة

وبعدين نقطع مرة تانية للاخر زى الصورة ننزل بالسكينة للاخر

هنكون كدة حصلنا على شريحة بطاطس بهذا الحجم والسمك

والشريحة دة مفتوحة من الوسط على شكل الفم او الساندوتش نكمل كل كمية البطاطس بهذة الطريقة الاول نقطع نصف قطع وبعدين قطعة كاملة حتى نحصل على شرائح بطاطس مفتوحة يا رب تكون الفكرة وصلت

هنا انا معصجة لحم مفروم ببصل وملح وفلفل اسمرومعلقة سمنة ومستوية خالص وبعد ما استوت ضفت عليها بقدونس مفروم بهذا الشكل

نمسك شريحة شريحة ونحشيها باللحم المفروم ونكبسها كويس باليد بهذا الشكل

وهكذا الى ان تنتهى الكمية

نبدأ نعمل خلطة القلى عبارة عن 3 حبات بيض مع نصف كوب حليب وعصير ليمون وملح وفلفل اسمر نخلطة كويس

ثم نضيف علية حوالى 3 ملاعق دقيق وممكن تحتاج دقيق اكتر او اقل حسب حجم البيض وكمية الخليط نبدا نربة كويس نخلطة يعنى

الى ان نحصل على خليط ثقيل نسبيا اقرب الى البشاميل بهذا الشكل

وده سمكه من قريب بهذا الشكل اهم حاجة انه يختلط كويس ولا يكون فيه كتل

ناخذ حبة بطاطس ونمسكها باليد ونغمسها فى الخليط واحنا ماسكنها برضة بايدينا بس نغطيها كويس بالخليط ونرفعها بالشوكة ومباشرة فى الزيت

نلاحظ شكلها وهى فى الزيت اول ما تنزل الزيت بتقفل على طول ومفيش اى حاجة بتخرج منها خالص واهم حاجة يكون الزيت ساخن كويس مقدوح يعنى ولما نحط البطاطس نستنى دقيقة ونقلبها على الوجة التانى وبعدين نخفض النار خالص علشان البطاطس تستوى كويس الدور بيقعد حوالى من 10 دقائق الى ربع ساعة

ودة شكلها بعد ما استوت واخدت اللون الذهبى الغامق نطلعها على ورق مطبخ علشان يمتص اى زيت فيها

وتقدم بالهنا صنف كتير جميل وبيعجب الكبار والاطفال جدا وممكن تغمس فى الثومية بتكون خطيرة والطريقة على الرابط التالى
(طريقة عمل سلطة الثومية بالصور والخطوات)
أو مع كاتشب او سيمن حسب الرغبة يعنى معلش طولت عليكم بس علشان اوصل المعلومة كويس بالتفصيل وبالهنا

** منوس ننوس **

(منى عبد المنعم)