دى كفتة بطريقة جديدة وطعمها حلو جدا وكمان ريحتها حلوة
انا بعملها جنب مكرونة بالصلصة وبطاطس محمرة وسلطة
طريقة العمل والتحضير
بنحضر صوص المكرونة نحط فى الحلة معلقة سمن مع معلقة زيت
واول ما تسخن نضيف لها عصير طماطم طازة
فى ناس بتعملها بمعجون الطماطم
لكن بالطماطم الطازة احلى كتير ونتركها تتسبك
دة شكل الصوص بعد ما تسبك
دة نوع المكرونة اللى بستعملها هى تركى
واسمها بشلار لكن تحفة وبيضة وما بتاخد سوى كتير
وفى منها اشكال كتيرة جدا دى حلزونية
هنا بكون حاطة على النار حلة فيها ماء يغلى
وشوية ملح ومعلقة صغيرة زيت ونتركها تستوى
نصفيها فى مصفاة ونفتح عليها ماء الحنفية البارد
عمرها ما تعجن لان كده احنا نزلنا النشا اللى فيها شايفين واحدة من واحدة
نفضيها على الصوص اللى جهزناه ونضبط الملح والفلفل
ونقلبها كويس وانا بحب احطها تانى على نار هادئة جدا
لمدة ربع ساعة ويستحسن نحط تحتها الشياطة
اللى هى عبارة عن صاجة مخصصة بنحطها تحت الحلة
علشان الاكل ما يتلسعش ودة شكل المكرونة بعد ما جهزت
شايفين مش معجنة ولا حاجة
طريقة عمل الكفتة البانيه
المكونات والمقادير
نحتاج الى حوالى نصف كيلو لحمة مفرومة
و 4 فصوص ثوم وبصلة متوسطة
وبقدونس وكزبرة وشبت يعنى حوالى 6 اعواد من كل نوع
واهم حاجة الكزبرة وهنحتاج الى رز ابيض مستوى
انا لما بيتبقى عندى رز جاهز للأكل بشيله فى الفريزر للوصفات دى
وطبعا ليمونة وملح وفلفل اسمر ومعلقة صغيرة بقسماط
كيفية العمل والتحضير
فى الكبة نحط البصل والثوم والخضرة ونفرمها
الرز المستوى حوالى نصف كوب بالشبة يعنى مش لازم نعاير
بعد ما فرمنا البصل والخضرة والثوم نضيف الرز
ونضيف اللحمة المفرومة والتوابل والليمون
ومعلقة بقسماط صغيرة ونخلط
بيكون دة شكلها كل حاجة متجانسة مع بعضها
نحطها فى طبق ونبدأ بتشكيلها
مع دهان اليد بالزيت لسهولة التشكيل
ممكن تتعمل اصابع بس انا بحب اعملها بالشكل دة صوابع مبططة بالشكل دة
هنا انا جهزت طبق فية دقيق وبقسماط على بعض
وطبق تانى فية بيض حوالى 2 وشوية حليب
ومعلقة زيت صغيرة وملح وفلفل اسمر وعصرة ليمون
نأخذ واحدة واحدة ونحطها فى خليط البيض
ثم فى خليط الدقيق
الى ان تنتهى الكمية كلها وبتكون بالشكل دة
نكون محضرين زيت ساخن ونبدا فى القلى
نلاحظ انها بتنفخ شوية ونقلبها على الجانبين
ممكن تقدم بشكل فردى بالشكل دة مع مكرونة وبطاطس وسلطة
أو تقدم مع بعضها بالشكل دة
ودة شكل الكفتة النهائى وبالهنا
** منوس ننوس **
( منى عبد المنعم )
جميله جدا تسلم جايمس يا انوس
ردحذفتسلمى الف شكر
حذف