تحضير تورتة على شكل علبة او باليت ألوان الرسم بالصور والتفصيل منوس ننوس

دى تورتة على شكل باليت الخاص بالوان الرسم بمعنى اللوحة اللى بنضع عليها الالوان الزيتية للرسم بالفرشاة يارب اكون وضحت الصورة تمام ودى كانت تورتة عيد ميلاد بنوتى حبيبتى شهد ال 11 بجانب تورتة تانية لابنى حبيبى عبد المنعم لانهم تؤام هاتشوفها كمان

نبدأ بسم الله

لعمل التورتة نحتاج الى كيك على شكل بيضاوى انا عملتها فى قارب اكروبال بايركس بيدخل الفرن طبعا لو مش متوفر نعملها فى صينية مستطيلة وبعدين ننحتها احنا على الشكل البيضاوى وانا انهاردة عملت التورتة بدقيق الاسبونج وهوة عبارة عن دقيق مخصوص بالتورتة الاسفنجية مضاف الية السكر والمواد الرافعة والكاكاو بس طبعا ممكن نعملها بالطريقة الاسفنجية المعتادة وسبق وشرحتها اكتر من مرة

المقادير والمكونات

نصف كيلو دقيق اسبونج كاكاو بما يعادل 3 كوب مج

6 بيضات +فانيليا ونصف ليمونة

نصف كوب ماء عادى

ومعلقة كبيرة محسن جيل اذا توفر وممكن بدون عادى خالص دة لزيادة الارتفاع

طريقة العمل

نضع البيض والمحسن والليمون والفانيليامع الماء ونخفق بسيط ثم نضيف الدقيق مباشرة ونستمر فى الخفق الى ان تتضاعف الكمية

وهنا بعد حوالى ربع ساعة خفق شايفين القوام رائع جدا وسهلة جدا جدا

دة شكل القارب وانا بصراحة كنت خايفة الكيكة تتحرق فية لانى ما استعملتوش فى الكيك قبل كدة ففضلت ابطنة بالكامل بورق الزبدة حتى الجوانب وطبها بدهن سمنة او زبدة علشان الورق يلزق فى القارب وكمان بعد ما فرشت الورق بطنتة تانى بزبدة ودقيق

ودة شكلة من الداخل

نصب فية خليط الكيك وندخلة الفرن بالشكل دة بياخد حوالى ساعة الاربع حسب فرنك

وهنا بعد ما استوت الكيكة رفعتها من القارب بورق الزبدة كلها بالشكل دة وعلشان اعمل شكل الباليت اقص منها جزء من جانب واحد فقط بالشكل دة بميل شوية

نشيل الجزء المقصوص

نقسم الكيكة الى نصفين علشان نحشيها من الداخل وهى طرية جدا جدا بس انا برضوا سقيتها سفن اب بصراحة اولا لونة ابيض مش بيغير فى الكيك وكمان بيديها طعم رائع

نحشيها كريم شانتى بالشيكولاتة

ثم اضع الجزء العلوى وفى المرحلة دى اضع الكيك على طبق التقديم مباشرة واضع تحتة من الاطراف كلها ورق زبدة للمحافظة على نظافة الطبق لغاية ما اخلص اسحب الورق وانا عملت كريم شانتى ابيض واخدت منة 6 معالق كبيرة كل معلقة لونتها بلون مختلف وسبتها على جنب للتزين والباقى ضفت لة لون اصفر بسيط لكى احصل على لون كريمى اغلف بية التورتة كلها

ونساويها كوييس بالاسباتيولا المعدن وعلشان يكون السطح املس نضع الاسباتيولا المعدن فى ماء مغلى بتكتسب سخونية نشيلها من الماء نمسحها بمنديل ومباشرة نساوى السطح بالشكل دةوهنا بعجينة السكر عملت فرشاة

دة شكل الفرشاة

وعملت انبوبة لون

وطبعا كنت بغلفهم علشان ما تنشفش وكمان عملت يافطة بينك اكتب الاسم عليها انا هنا كنت اشتريت عجينة السكر جاهزة اشتريتها بيضاء وانا لونتها بالوان ويلتون

هنا بدأت فى الفنشنج الاخير حطيت دوائر الكريمة اللى لونتها من قبل ثم اضع الفرشاة

وكتبت بالكريمة على القاعدة ووضعت الانبوبة بالشكل دة

يارب اكون قدرت اشرح شرح وافى ومفصل انا عملت الباليتة لانها من هواة الرسم جدا ودى هواية مفضلة عندها

ربنا يبارك فى اولادكم جميعا وبالهنا

ودى شكل السفرة بكل الاصناف وهتلاقوها كلها فى المدونة فى قسم التورتات والكيكات بالتفاصيل بس بدون المشروبات والصواريخ لسة

ودة شكلها النهائى

تحياتى لكم

منوس ننوس