طريقة عمل تورتة كرة القدم بعجينة السكر بالصور والتفصيل للشيف منوس ننوس

دى تورتة على شكل كرة قدم مجسمة مغلفة بعجينة السكر

عملتها لابنى حبيبى عبد المنعم فى عيد ميلادة ال11

عجينة السكر انا عملتها قبل كدة بس بصراحة المرة دى استسهلت واشتريتها جاهزة جبتها بيضاء ولونتها انا

المقادير

كيلو دقيق اسبونج ابيض

12 بيضة +فانيليا +نصف ليمونة

كوب ماء

2 معلقة كبيرة محسن كيك جيل

طريقة العمل

طبعا هنا المقدار كبير لانى هاعمل 2 بولة كل واحدة نصف دايرةعلشان نلزقهم على بعض نعملها كورة

وكمان هاعمل قاعدة مقاس 26 فى صينية بيتزاقاعدة ارتفاعها بسيط مجرد قاعدة فقط

دة شكل القالب انا عملتة فى بولة بايركس وغلفتها بورق الزبدة ودة شكل القالب

ودة شكل الدقيق الاسبونج

نخلط البيض مع الفانيليا والمحسن والماء خلط بسيط

ثم نضيف الدقيق وميزة الدقيق دة ان كلة بيتخلط على بعضة ومجرد ضرب فقط مدة ربع ساعة الى ان يتضاعف الحجم جدا

ودة شكلة بعد الضرب المبرح ربع ساعة تقريبا

نصب الخليط فى البولة المبطنة

وهنا دى القاعدة كمان

ودة شكلهم بعد الخبز طبعا البولة دى انا عملت منها 2

ودى القاعدة

انا عملت الكيك من بلليل وزينتة تانى يوم بصراحة نجى بقة للتطبيق

الاول نضع القاعدة ونضع عليها طبقة كريم شانتى

ثم نضع نصف دائرة الجزء الصغير تحت والكبير فوق وانا كمان قطعتها نصفين وحشيتها كريمة ومربى مشمش وممكن تستغنوا عن الخطوة دى وتعملوها بس على الطبقة اللى فوق علشان نلزق فيها النصف التانى

بالشكل دة نلزق فيها الجزء التانى بالعكس علشان نحصل على كورة

ثم نغلفها كلها بالكريمة

وهنا انا عملت شكل المربعات اللى فى الكورة على ورقة علشان اقص عليها عجينة السكر انا هحتاج جزء ابيض نفردة دائرة كبيرة جدا تغطى التورتة كلها

نغلف بيها الكورة والقاعدة

ونطلع الهواء كويس جدا علشان ما يكونش فيها اى تعرجات من تحتها

وهنا قطعت بلون الاحمر المربعات دى

بالشكل دة هنحتاج 7 منهم

نعمل خليط من الماء والسكر علشان الزق بيهم اللون الاحمر ابدا اضع فوق اول مربع احمر وبالسكينة من الناحية العادية او بادوات الخاصة بالفندان نعمل علامات بالشكل دة

ثم نضع باقى المربعات الحمراء بهذا الشكل

وانا بردوا الشكل الابيض عملتة بنفس الورقة

ثم بالكريم شانتى لونتة اخضر اعمل على القاعدة العشب

وبعدين كتبت بالكريمة ودة الشكل النهائى يارب اكون افدتكم وتكون عجبتكم

بالهناودة شكل السفرة

منوس ننوس

منى عبد المنعم