طرق تخزين الثوم فى المنزل بالخطوات كما لم تعرفها من قبل بطريقة منوس - مدونة عايزين ناكل

بدايةً

طبعا كتير منا بيحب يخزن الثوم حتى يكون فى متناول ايدينا ويكون سهل علينا استعماله .. فية طرق كثيرة لحفظ وتخزين الثوم  .. وان شاء الله فى الموضوع ده هاقولكم على افضل طريقة حلوة تحفظى الثوم بيها من السنة للسنة.

معلومة تهمك عن الثوم :

1- اول ما يطلع الثوم وهوة لسة اخضر بيكون سعرة رخيص وكمان بيكون سهل فى تقشيرة وفرمة.

2- ويفضل لما تشتريه تشترى الحجم الكبير منة علشان يكون سهل عليكى.

3- ميزة الطريقة دى انة لا بيغير طعمة ولا لونه بيفضل محتفظ بلونة الابيض الحلو لاخر برطمان.

طريقة اعداد الثوم للتخزين :

الطريقة بقى هاتى كميات كبيرة من الثوم الاخضر حسب استعمالاتك وحسب رغبتك

1- قشرى القشرة الخارجية فقط زى ما بتقشرى البصل كده.

2- اقطعى الراس البيضاء دى بس اللى هاتاخديها.

3- اما الجزء الاخضر العمود دة ترمية وكمان الجزء الناشف اللى تحت فى نهاية الراس تشيلة هوة والعمود اللى فى النصف من جوة علشان ما يبوظش سكينة المفرمة او الكبة.
4- قطعية وافرمية فى الكبة او المفرمة بس المفرمة بتخلية مفرفر افضل واحسن يعنى مش معجون والافضل تخلطى معاة ملح بيحافظ علية وبيخليه مايمسكش فى بعض.

طريقة التخزين والحفظ :

1- ممكن بقى تعبيه فى أكياس وتربيطيها كويس جدا.

2- وكمان ممكن فى قطع من الاكياس الصغيرة بمثابة معلقة ثوم وتقفليهم وتحطيهم كلهم فى علبة او برطمان زجاج محكم الاغلاق فى الفريزر علشان ما يعملش ريحة نهائى.

3- وكمان ممكن فى برطمان زجاج وتقفليه كويس.
4- ممكن تشترى قوالب ثلج وتخليها مخصوص للثوم بعد ما تفرمية تعبية فى القوالب وبكدة كل مكعب هايكفى الوصفة ولو احتاجتى اكتر تاخدى العدد اللى تحبيه على شرط انك برضوا تحطى القالب فى كذا كيس وتغليفة كويس لغاية ما يجمد تشيله من القوالب وتحطيه فى أكياس او علبة او برطمانات.

شرط اساسى :

اول ما تخلصى فرم على طول على الفريزر علشان ما يصفرش.

ملحوظة هامة :

1- لو هاتحطيه فى كيس تحطي فى الكيس الخارجى قطعة فحم بتقضى على اى روائح فى الفريزر

2- وكمان لما تحتاجى تاخدى منة وهو متجمد متنتظرييش لغيت ما (حتى) يفك لانه كدة هايخرب او يبوظ

نهايةً

يارب اكون قدرت اوصل لكم معلومة مفيدة وطريقة سهلة يا حبيباتى .. ومنتظرة ارائكم واستفساراتكم.
لا تنسونى بصالح دعائكم
**منوس ننوس**
(منى عبد المنعم )