طريقة عمل سلة شم النسيم والمنجأونة - البريوش او الفرسكة من منوس ننوس

المقادير والمكونات

4كوب ونصف دقيق

2معلقة كبيرة خميرة فورية

نصف كوب سكر

2 بيضة +فانيليا

ربع كوب زبدة على زيت

كوب حليب دافئ للعجن

طريقة العمل

نضع المقادير الجافة مع بعض ونقلبها بس نبقى نصف كوب دقيق للاخر ثم الزيت والزبدة والبيض ونعجن بالحليب ولو احتاجت دقيق تانى نزود من النصف كوب اللى شيلناة فى الاول ودة شكل العجينة 

ونغطيها ونتركها تخمر نصف ساعة او على حسب المكان ودة شكلها بعد الخمر 

هنا هابدا اشرح طريقة سلة المعجنات

ناخد 2 كرة من العجين بهذا الشكل ونفردهم الى 2 مستطيل 

ثم نقطع كل مستطيل الى شرائح رفيعة بالشكل دة 

هنا نبدا فى التشكيل فى مستطيل نتركة امامنا بالشرائط زى ما هوة ودة اللى هانشتغل علية ونبدا ناخد من المستطيل التانى شريط ونرفع شريط من المتطيل الاول ونترك اللى بعدة وهكذا نرفع واحد ونترك واحد ثم نضع الشريط بالشكل دة ونرجع نرجع تانى الشرائط المرفوعة ونرفع التانية اللى سيبناهاة فى الاول يعنى العكس الصورة هاتوضح ليكم المقصد 

وهكذا الى ننتهى من الشرائط ونحصل على الشكل دة شكل السلة 

ثم نضغط عليها بالنشابة (الشوبك )ونلفها عليها بحذر علشان نعرف نرفع العجينة 

هنا نحضر اى طبق دائرى او حلة بدون يد ونغلفها بالفويل ونضعها على صينية الفن وهى مقلوبة بالشكل دة 

ندهنها بالزيت ونضع عليها العجين بهذا الشكل 

ثم نقص الاطراف الزائدة ونعمل بالعجين ضفيرة من طرفين فقط ونلفها على الجوانب من تحت بهذا الشكل 

وندهنها بخليط البيض والحليب وانا بحب احط رشة نسكافية وفانيليا لاخفاء رائحة البيض ونضعها فى الفرن ودة شكلها بس هى زادت تحمير منى شوية 

وهنا نعمل ظفيرة ثلاثية علشان تكون يد السلة بهذا الشكل ونضعها بشكل قوس فى صينية الفرن 

ونقلب السلة ونشيل الحلة وبراحة خالص نشيل ورقة الفويل ونرجعها تانى الفرن تاخد لون من الداخل 

ودة شكلها من الجوانب 

هنا نبدا نعمل فى معجنات المنجأونة او الفرسكة او البريوش اشكال مختلفة من نفس العجينة دة اول شكل الوردة بحشو التمر (العجوة ) نعمل كرات من معجون التمر وكرات متساوية من العجين 

ونفرد العجين الى دوائر ونضغط على التمر باليد نعملة دائرة ايضا ونضعة فى داخل العجين ونغلقها ونساويها بالنشابة بسيط ونعمل فتحات بهذا الشكل بسكينة البيتزا بدون ما نصل الى المنتصف على شكل مثلثات 

ثم نمسك مثلث مثلث ونقلبة على الجنب ونضغط علية ضغطة خفيفة بالشكل دة وندهنها ونرش المنتصف بالسمسم 

وهنا هانعمل شكل تانى الشكل التقليدى للبريوش ناخذ قطعة من العجين ونعملها حبل طويل ونبدا نلفها على شكل حلزونى 

لنحصل على هذا الشكل وعند وضعها فى صينية الخبز نراعى وضع طرف العجين تحت 

وهنا شكل تالت ممكن نسمية فيونكة ناخد حبل اخر من العجينة ونعملة على شكل حرف Uونلف طرف على الاخر ونقابل الطرفين ببعض واحد من فوق والتانى من تحت بهذا الشكل 

لنحصل على الشكل النهائى دة 

وهنا الشكل النهائى للمعجنات 

وممكن تقدم بداخل السلة بهذا الشكل انا طبعا ثبت يد السلة بالاعواد الخشبية يارب تعجبكم

***منوس ننوس***

(منى عبد المنعم)