طريقة عمل الكسكسي السريع بالمنزل بالتفصيل بالصور والخطوات

دى حلة بخار ودة شكل الحلة وهى فوق بعضها
وطبعا لو مش موجودة ممكن اى حلة عادية وفوقها
مصفاة بقطعة القماش برضة بشرط ان المية ما توصلش للمصفاة

دى الحلة المصفى اللى بعمل فيها الكسكسى الجزء العلوى من الحلة 

انا بحب احط فيها قطعة قماش ابيض زى الشاش زى كدة

طريقة العمل والتحضير

دة حوالى 2 كيلو دقيق بس هو ملهوش معيار ثابت بحط الدقيق
مع رشة فانيليا بودرة مع ذرة ملح واحط جزء جزء فى محضرة الطعام

وبقفل الكيتشن وابدا من فوق اضيف الحليب شوية شوية مع التشغيل المستمر والحليب بيكون عادى مش سخن ولا مغلى مباشرة من العبوة ومن باب العلم بالشئ فى ناس بتسقية شوربة بط بدل الحليب بس انا عن نفسى بحبه بالحليب احلى بكتير وكمان الحليب مناسب للسكر وبرضة لو فى ناس بتحب تاكلة بالخضار يمشى فى الحالتين

اتوقف عن اضافة الحليب عندما يصبح شكلة كدة زى حبيبات الرمل 

اضعة فى الحلة واغطية وطبعا الحلة دى تحتها حلة تانية فيها ماء بيغلى على النار يعنى بيستوى على بخار الماء بسيبة على النار طبعا كدة هوة بيستوى بالبخار حوالى ساعة 

وبعدين افرغة فى طبق عميق بيكون دة شكلة لانة مضغوط

ارجع اخد كمية كمية منة تانى واحطة فى الكيتشن
واخلط مع اضافة نقاط تانى ن الحليب الى ان تنتهى الكمية 

بيكون كدة شكلة مفرفر زى ما انتم ملاحظين ارجع احطة تانى
فى نفس القماشة ونفس الحلة هنلاحظ ان كميتة بتزيد بالشكل
دة ملئ الحلة على الاخر هرجعة تانى على النار حوالى ساعة تانية

 

وبعدين افضية واقدح لة سمنة بلدى الكمية حسب الرغبة
وارجع اطحنة تانى فى الكيتشين علشان اضمن ان السمنة
تخللت كل ذرة منة ويكون متجانس

ودة بيكون شكلة النهائى ويقدم مع السكر البودرة وبالهنا

وعلى فكرة ممكن يتعمل من غير كيتشن خالص ماما ربنا يخليها
كانت بتعملة زمان فى حاجة اسمها الغربال معروفة عندنا فى مصر طبعا
كان متعب بس كانت نفس النتيجة بالضبط

وممكن يرش علية سكر بودرة ويؤكل كصنف حلو
وممكن يستعمل مع الخضار ويؤكل كطبق رئيسى

**منوس ننوس**

(منى عبد المنعم)