تحضير الفطير المشلتت بالتفصيل بالصور فى البيت من الشيف منى عبد المنعم

طريقة العمل

كيلو دقيق علية معلقة كبيرة ملح ويعجن بالماء الفاتر حسب الحاجة 

هنا انا حطيت الدقيق والملح وقلبت شوية

وبعدين ضفت الماء بالتدريج الى ان اصبحت العجينة لينة بعدين ضبطها بشوية دقيق كمان مفيش مشكلة

الى ان نحصل على عجينة متماسكة مش بتمسك فى اليد بهذا الشكل

نقسم العجينة الى كرات متساوية انا هنا عملتها كرات كبيرة نسبيا لانى عايزة الفطير كبير ولو عايزاة صغير تصغرى الكرات ندهن الصينية زيت ونضع عليها الكرات وتغطى بالنايلون وتترك حوالى ساعة او ساعتين ترتاح علشان نعرف نشدها كويس

هنا جبت طبق وخلطت فية زبدة سايحة على زيت علشان استعملها فى الفطير ندهن الرخامة او الطاولة انا هنا عملت على السفرة علشان اخد راحتى فى الفرد 

وناخد كرة ونضغط عليها باليد نفردها شوية وبعدين بالنشابة نفرد لغاية لما تكبر شوية

وتبقى بالشكل دة نسيب النشابة ونبدا نستعمل اليد

بالشكل دة نبدا نشد من الاطراف زى ما انا بعمل كدة من كل الاطراف علشان نخليها رقيقة على قدر المستطاع

زى ما انتم ملاحظين من كل طرف

الى ان تصبح بهذا الشكل ومفيش مشكلة لو فى حتت صغيرة اتقطعت عاد يعنى ندهنها بخليط الزبدة والزيت ونبدا نطبقها

كل طرفين قصاد بعض من اليمين والشمال الى ان نحصل على مستطيل ثم من الجانبين الى ان نحصل على مربع

بهذا الشكل يترك جانبا ونقوم بفرد كرة تانية وندهنها زبدة وزيت وناخد الاولى ونحطها فيها

فى المنتصف بهذا الشكل ونطبق بنفس الطريقة الاولى

بالشكل دة وهكذا الى ان ننتهى من الكرات انا بحط فى كل فطيرة 6 كرات

ودة شكلها بعد ما خلصت دى انا حطيتها فى صينية مربعة

ودى واحدة تانية فى صينية مدورة نتركها ترتاح نصف ساعة قبل ما ندخلها الفرن

وبعدين نقفل اليد ونضغط على الفطيرة بقبضة اليد نملا بيها الصينية دى المسطتيلة

ودى المدورة وبعدين توضع فى الفرن حوالى تلت ساعة او حتى الاحمرار

ودة شكلها اول ما طلعت من الفرن تبقى دائرية

او مربعة بهذا الشكل ومن جوه رقات وبالهنا

** منوس ننوس **

(منى عبد المنعم)