طريقة عمل سينامون رولز بالصور والخطوات بالتفصيل من مطبخ الشيف منوس ننوس

سينامون رولز ناس كتير بيسموها سينابون هى أسمها سينامون بالميم وليس الباء

صوص الكراميل

نحتاج الى علبة كريمة لبانى نصف كيلو + سكر نصف كيلو

انا هنا استعملت السكر البنى الخشن بس مش ضرورى ممكن بالسكر الابيض العادى

اوقات بعمله بالابيض واوقات بالبنى حسب المتوفر عندى 

الخلاصة ان كمية السكر والكريمة تكون متساوية 

كمان هنحتاج الى مكعب زبدة صغير بحجم قطعة جبنة كيرى وربع كوب ماء

طريقة الإعداد والتحضير

نضع الحلة على النار ونحط السكر والماء والزبدة

نتركها الى ان تغلى والسكر يسيح ويتحول الى الكراميل البنى الغامق يقضل نغمقة زى الصورة كدة لانلونة هايفتح شوية عند اضافة الكريمة

نخفض النار شوية ونضيف كمية الكريمة كلها مرة واحدة ونخلى بالنا لانها بتفور نبدا نقلب كويس وعلى فكرة ممكن السكر يجمد تانى شوية زى الصورة بس ماتقلقوش استمروا فى التقليب لغاية ما يسيح تانى ويختلط بالكريمة نسيبهم يغلومع بعض دقيقتين وبعدين نرفعة من على النار

نفضية فى اى اناء ونتركة يبرد طبعا هى هتكون خفيفة وسائلة فى الاول بس لما تبرد نحطها فى التلاجة شوية هاتتقل وهاتبقى صلصلة توفى او كراميل جميلة جدا

انا هنا حبيت تشوفوا السمك بتاعها كدة بعد ما حطيتها فى التلاجة 

نفرغها فى اناء تانى للتقديم بجانب السينابون كل واحد يحط حسب الرغبة

مقادير ومكونات السينامون

نصف كيلو دقيق - 3 بيضات وطبعا فانيليا وعصرة ليمون - 2 معلقة كبيرة خميرة فورية - 1 معلقة كبيرة سكر - 4 معالق كبيرة حليب بودرة - نصف كوب حليب دافئ للعجن ممكن يزيد او يقل حسب العجينة - و2 معلقة كبيرة زبدة لينة

طريقة العمل

نحط كل المقادير الجافة على بعض ونخلط 

نحط الزبدة ونخلط حتى تختلط بالعجين بهذا الشكل

نضيف كمية البيض ونخلط ثم كمية الحليب ونعجن كويس

دة شكل العجينة نضع العجينة فى اناء ونغطية بالنايلون ونتركها حتى تخمر

ودة شكلها بعد ما اختمرت

نضع العجينة على رخامة مرشوشة بالدقيق

ونفردها على شكل مستطيل

ندهنها بكمية زبدة كويس دى مالهاش عيار المهم نغطى كل العجينة زى الصورة كدة

نرش عليها كمية من القرفة الكمية حسب الرغبة

وبعدين نرش كمية من السكر الناعم المطحون طبعا ممكن السكر الابيض بس انا عملتة بسكر بنى طعمة بيكون اقوى بس الاتنين يمشوا مفيش مشكلة

دة شكل السكر البنى اللى فى حشوة السينابون بيكون مندى كدة

نبدأ نلفه رول

هيكون بالشكل دة

نقطعة بالسكينة الى حلقات متساوية بسمك حوالى 1سم

ودة شكل الحلقة لاحظوا الطرف اليمين دة لازم نحطة تحت العجينة علشان لما تخمر وما تفتحش

لما نحط الطرف هيكون كدة شكلها مباشرة نضعها فى الصينية

انا هنا حطيتة فى صوانى الكب كيك بيطلع كلة حجم واحد بس طبعا لو مفيش الصوانى دى ممكن نرصة فى اى صينية عادية بس نسيب مسافة بين كل واحدة وعلى فكرة ما ندهن الصينية اى حاجة خالص نسيبة يرتفع شوية

ودة شكلة بعد ما ارتفع ندخلة الفرن على درجة حرارة مرتفعة بياخد تقريبا ربع ساعة مش كتير ويفضل ما نحمروش قوى كل ما كان ذهبى كل ما كان احسن

دة شكلة اول ما خرج من الفرن 

ملاحظة

لازم نطلعة مباشرة من الصينية وهو سخن لانه لو برد فى الصينية هايمسك فيها بسب السكر فخلو بالكم

هنا دة تقديم بشكل فردى وعند التقديم يضاف الكراميل

ودة شكلة النهائى بألف هنا ومعلش طولت عليكم بالتفصيل الممل
بس علشان اكون واضحة فى الشرح

** منوس ننوس **

(منى عبد المنعم)