من أجمل الأكلات الشعبية عندنا فى مصر كتير بيحبو مكوناته والطعم رائع جداً
المكونات
الكميات والمقادير حسب الرغبة
2 كوب رز مصرى نى
كوب عدس اسمر منقوع من الليل
كيس مكرونة ونصف كوب شعرية
وكمية من البصل المقطع صغير
وحوالى نصف كيلو حمص الشام منقوع من الليل أيضاً
طريقة التحضير والإعداد
العدس نسلقة ونصفى من المية فى المصفاة ونفتح علية ماء علشان نتخلص من ماء السلق ويترك جانبا وايضا نسلق الحمص ونضع فى ماء السلق ملح وكمون
اول حاجة هنحضر الكشرى
نجيب حلة كبيرة نضع فيها 2معلقة كبيرة زيت وناخد بصلة كبيرة نبشرها او نقطعها صغير ونحطها على الزيت ونحمرها شوية
ولما تبدأ تصفر نضيف نصف كوب شعرية ونحمرهم مع بعض
الى ان نحصل على لون بنى فاتح بهذا الشكل
هنا طبعا انا سلقت العدس وصفيته وضفت الرز الابيض النى المغسول طبعا علية وضيفتهم على الشعرية والبصل
نحط الماء انا هنا مثلا 2 كوب رز عليهم كوب عدس نحط الماء 2 كوب وربع بس ماء لان العدس مستوى يعنى نحط عيار الرز وزيادة ربع كوب بس وطبعا ملح وكمون اساسى وفلفل اسمر ونتركة يغلى واول ما يغلى ومياهه تبدأ تنشف نوطى النار خالص ونتركة يستوى زى الرز العادى
هنا نحضر صوص الطماطم نجيب حلة ونضع فيها معلقة زيت ونكون محضرين فى وعاء الخلاط كمية من الطماطم المقطعة مع بصلة صغيرة مع حبة واحدة فلفل اخصر و2 فص ثوم وشوية ماء كلة على بعض ونخلط ولما الزيت يسخن نضيف الصوص علية ونضيف ملح وكمون وفلفل اسمر وشطة ونتركها تتسبك شوية
هنا انا حمرت كمية بصل علشان نحطها على الكشرى قطعت البصل فى محضرة الطعام وضفت معاة معلقة دقيق علشان يقرمش وبعدين قليته فى الزيت وبس
ودة شكل الكشرى بعد ما استوى
وهنا انا سلقت مكرونة اى شكل تحبوه
ولما اتسلقت ضفت ليها معلقة زيت ورشة كمون
هنا بعد ما كل المكونات استوت انا بحب اجمعها كلها فى قارب بايركس مثلاً زى دة
الاول نضع كمية الكشرى كلة (عدس ورز وشعرية )
ثم المكرونة المسلوقة بهذا الشكل
ثم الحمص
ثم البصل المحمر وده بيكون شكله فى القارب طبقات وكدة افضل كتير فى التقديم واللى يحب يغرف حسب الكمية اللى يحتاجها
وهنا كمان عملت الدقة عبارة عن فى وعاء الخلاط
نضع كوب ماء علية خل وليمون وواحدة فلفل اخضر
و5 فصوص ثوم وملح وكمون كتير ونضربهم فى الخلاط وبس
ودة التقديم النهائى وبالهنا
** منوس ننوس **
(منى عبد المنعم)
تعليقات
إرسال تعليق