الاول انا هاقولكم على تتبيلة حلوة جدا للاسماك انا بعمل كمية وبحطها فى برطمان فى الثلاجة تكون جاهزة لما احتاجها وهى ملهاش مقدار معين
مكونات ومقادير تتبيلة السمك
رأس ثوم مقشرة + نصف كوب ملح + 4 ملاعق كبيرة كمون + عصير 4 ليمونات + فلفل احمر شطة مفروم دة اختيارى وممكن يبقى فلفل احمر بس مش شطة على حسب الرغبة يعنى بس بيفرق فى الطعم كتير
طريقة عمل تتبيلة السمك
انا بحطهم كلهم على بعض فى المطحنة او محضرة الطعام
واخلطهم لغاية مايتكون شكل كريمى كدة وناعم احتفظى بيها فى برطمان فى التلاجة
ودى اسهل طريقة لتتبيلات الاسماك بصفة عامة من غير ما تدقى فى هون ولا حاجة
طريقة تحضير وإعداد السمك المقلى
وهنا طبعا انا نظفت السمك من برة وجوة كويس جدا
بالشكل دة وتبلتة بالخلطة السابقة
وطبعا نعصر ليمون كتير نتركة حوالى ساعة او اكتر بالتتبيلة
وكمان انا بحب اعمل فية فتحات علشان يشرب من طعم التتبيلة بالشكل دة
هنا نحضر كيس ونضع فية دقيق عل شوية بقسماط بيدى طعم مقرمش للسمك دى طريقتى وكمان رشة ملح صغيرة ورشة كمون
نضع السمك واحدة واحدة فى خليط الدقيق والبقسماط
انا بفضل الخطوة دى زى ما انا عاملة كدة بداخل الكيس
نهز الكيس كويس حتى تتغطى السمكة كاملة بالدقيق
وعلى طول على الزيت الساخن ويكون زيت غزير
نتركها دقيقتين على وجهها وبعدين نقلبها على الطرف التانى
ونتركها حوالى عشر الى ربع ساعة تستوى مع مراقبتها
الى ان نحصل على اللون الذهبى الجميل دة
ونضعها على ورق مطبخ لإمتصاص الزيوت الزائدة
وتقدم بالهنا مع رز ابيض مصرى او رز صيادية وسلطة
** منوس ننوس **
(منى عبد المنعم)
تعليقات
إرسال تعليق