غريبة العيد ناعمة جدا وحلوة الوصف مكتوب بالتفصيل مع الصور يا رب تعجبكم
المقادير والمكونات
1 كوب سمنة بلدى عليه نصف كوب سكر ناعم جدا بودرة علية 3 كوب دقيق بس نحط الدقيق شوية شوية
طريقة العمل والتحضير
هنا السمنة فى درجة حرارة المطبخ بس كدة
مش هاينفع نستعملها لازم نحطها فى الثلاجة تجمد
وعلى فكرة طبعا انا هنا ضربة المقدار فى 3 يعنى مكرراه 3 مرات
هنا دة شكل السمنة بعد ما جمدت
نحط كل كمية السكر ونخفق كويس جدا
دى اول مرحلة فى الخفق نستمر فى الخفق برضة الى ان تبيض وتهش خالص وممكن نضيف فانيليا نترة صغيرة بتخلى رائحتها حلوة
دة شكلها بعد تمام الخفق
نبدأ باضافة الدقيق شوية شوية حتى تلم العجينة
ودة شكلها النهائى وعلى فكرة لو حسيتوا انها لسه بتلزق رشى شوية دقيق صغيرين
دة هنا شكل ملبس الفضة الخاص بالغريبة والحلويات
بنحطه فى الوسط بيدى شكل حلو طبعا ممكن الاستغناء عنه
وتلوين جزء من العجينة بالكاكاو ونضع منها فى المنتصف بدل الفص الملبس
هنا نشتغل بالعجينة على طول ولازم نخلى جنبنا فوطة نظيفة علشان دايما نمسح كف اليد بيها علشان تكون الغريبة شكلها مرتب ناخد جزء صغير بالشكل دة فى كف اليد بين ايدينا الاثنين بس معلش الايد التانية بصور بيها
ونكورها بالشكل دة
ونرصها فى الصينية بالشكل دة ولما نجي نحط الفص فى المنتصف
نضغط ضغطة خفيفة خالص
وده الشكل التقليدى للغريبة
وعلى فكرة مش بتفرش خالص هى بس بتكبر حاجة بسيطة
انا هنا حبيت أجدد عملت جزء بكيس الحلوانى وانا بحب الحجم يكون صغير علشان تبقى على الفم مرة واحدة على شكل وردة بالشكل دة وندخلها الفرن لازم يكون الفرن شغال قبلها ونخلى بالنا لازم الغريبة يا دوب تأخذ لون خفيف ما ينفعش تتحمر
والصورة التالية شكلها بعد ما استوت
ملحوظة : لازم لما نطلعها من الفرن نسيبها على الصوانى لغاية ما تبرد خالص
لانها بتكون ناعمة جداً ولو شلناها على طول هتتكسر، ونخلى بالنا أن الغريبة مش بتاخد وقت فى الفرن حوالى 10 دقائق لكن بتختلف المدة من فرن لفرن نظراً لإختلاف كل فرن عن الأخر، وهى مش كيك فممكن نفتح كل شوية الفرن من وقت للتانى نبص عليها ونخلى بالنا لازم يكون لونها أبيض ومش تتحمر
ودة الشكل التانى وان شاء الله هتعجبكم وبالهنا
خشوا على اللينك التالى فيه وصفات متنوعة لحلويات العيد أختارى الوصفة اللى تعجبك وادخلى فيها ويارب تحوز على أعجابكم
** منوس ننوس **
(منى عبد المنعم)
تعليقات
إرسال تعليق