طريقة عمل مكرونة بشاميل بالصور والخطوات والتفصيل من مطبخ الشيف منى عبد المنعم

طريقة الإعداد والتحضير

الطريقة دى مختلفة شوية فى البشاميل لأنى بعمله بدون بيض نهائى لكن بجد بتطلع حلوة دة بشهادة اللى اكلها

هنا طبعا بنسلق المكرونة الأقلام الخاصة بصوانى الفرن نحط الماء يغلى وبعدين نضيف ملح ومعلقة صغيرة زيت ونضيف المكرونة حوالى نصف كيلو ونتركها نستوى وبعدين نصفيها

فى الوقت ده نكون بنجهز البشاميل نحط فى الحلة 3 معلقة سمنة وحوالى كوب دقيق ما يعادل 8 معالق كبيرة ونقلبة كويس دقيقتين كدة على النار

لمزيد من التفصيل نرجو قراءة الوصفة التالية
(طريقة سهلة لتحضير صوص البشاميل أو الوايت صوص)

وبعدين نحضر لتر حليب نضيفه مرة واحدة وليس على دفعات علشان ما يعملش كتل ونضيف ملح وفلفل ونستمر فى التقليب ممكن نستعمل المضرب اليدوى

ونستمر فى التقليب حتى يغلظ قوامة ويصبح كريمى بهذا الشكل مفيش اى كتل وعلى فكرة انا بعمل المكرونة بالبشاميل بدون بيض نهائيا

بعد ما صفيت المكرونة نضيف عليها حوالى نصف خليط البشاميل ونظبط الملح والفلفل ونقلب كويس بالشكل دة

نجيب قارب فرن وندهنة بالسمنة ونضيف نصف كمية المكرونة

وبعدين نضيف اللحمة المفرومة المعصجة وممكن تتعمل اللحمة بيضاء بدون صلصلة طماطم وممكن بصلصلة حسب الرغبة بالشكل دة

ثم باقى كمية المكرونة

ثم كمية البشاميل المتبقية وتدهن سمنة بسيط فقط بدون بيض بيكون مقرمش وحلو وندخلها الفرن بتاخد حوالى ساعة الى ان تحمر كويس

وده شكلها النهائى بعد ما طلعت من الفرن

ودة شكلها من جوة لتبقى طرية وجميلة وبالهنا

** منوس ننوس **

(منى عبد المنعم)