كيفية عمل رينبو سويسرول بالكريمة بالصور والخطوات من وصفات الشيف منوس ننوس

النوع ده بيطلق عليه أسم رينبو سويسرول أو سويسرول قوس قزح

المقادير والمكونات

4 بيضات + فانيليا

عصير نصف ليمونة

ثلاثة ارباع كوب سكر بودرة ناعم

كوب دقيق

معلقة صغيرة باكينج بودر

معلقة كبيرة ماء بارد عادى

ألوان طعام

كريم شانتيه

طريقة العمل والتحضير

اولا نضع البيض مع السكر البودرة والفانيليا والليمون

ولازم يكون البيض خارج الثلاجة يعنى بحرارة المطبخ 

نخفق الخليط جيدا الى ان يملأ الاناء ويتضاعف حجمة ويعمل علامة على سطح الخليط عند رفع المضرب ولونة بيفتح بهذا الشكل 

ثم ننخل الدقيق والبودر ونضيفة على الخليط ونخلط بخفة بالإسباتيولا من تحت لفوق حتى نحتفظ بالهواء ثم نضع معلقة الماء البارد ونقلب تقليبة خفيفة 

هنا انا قسمت العجين فى فناجين او بولات على عدد الالوان اللى نتى تحبيبها طبعا انا هعمله قوس قزح (رينبو) وعلبة الالوان دى شاملة 12 درجة لون بصراحة جايانى هدية من امريكا هى جيل لكم متوفر هنا فى الهايبرات ألوان سائلة سعودى حلوة جدا موجودة عندى بستعمل دى او دى

وهنا بعد ما لونتهم 

هنا بكل سهولة نحضر اكياس نايلون بتاعت الثلاجة ونضع الكيس بشكل مائل فى كوب مثلا ونصب فية الخليط بهذا الشكل 

وهكذا مع باقى الالوان بهذا الشكل 

هنا نحضر صينة فرن مستطيلة او مربعة وندهنها بسيط

ونضع ورقة زبدة وندهنها بسيط ايضا 

وهنا نبدا نعمل خطوط طولية كل خط بلون

الى ان نعمل من كل الالوان ونرجع نكرر تانى 

بهذا الشكل ودة شكلة النهائى نحطها فى الفريزر تتجمد حوالى خمس دقايق

حتى لا تختلط الالوان 

ثم نضعها فى فرن حار حوالى عشر دقائق فقط لازم ما نغيبهاش علشان لما نيجى نلفها ما تتكسرش ودة شكلها بعد ما استوت شايفين منتظمة ازاى 

انا هنا قلبتها على فوطة مطبخ نظيفة مندية بالماء يعنى نحط عليها ماء ونعصرها كويس حاجة بسيطة حتى لا تلتصق فى الكيك ومباشرة

وهى سخنة نلفها بالفوطة ونتركها تبرد تماما 

ولما تبرد نفكها برفق وهنلاقيها واخدة وضع اللفة بهذا الشكل 

ثم نحشيها بالكريم شانتى الفانيليا وممكن مربى كمان

بس انا فضلت الابيض علشان الألوان تكون واضحة 

ونلفة تانى بدون الفوطة بهذا الشكل وممكن نلفها بالطول او بالعرض حسب الرغبة 

ونغلفها بالنايلون ونضعها تانى فى الثلاجة شوية علشان نقطعها 

وهنا دة شكلة من جانب 

وهنا من جانب تانى علشان تشوفوا كل الالوان 

وهنا شكلة بعد التقطيع 

ودة الشكل النهائى يارب يعجبكم وبالف هنا

** منوس ننوس **

(منى عبد المنعم)

وفيه طريقة كمان مختلفة للسويسرول لو تحبوا تشوفوها على الرابط التالي

(طريقة عمل السويسرول بأشكال مختلفة بالصور والخطوات)