طريقة تخزين وحفظ الملوخية الخضراء بالصور والخطوات من الشيف منى عبد المنعم

طريقة التخزين

انا انهاردة جايبلكم طريقة حلوة جدا وسهلة لتخزين الملوخية الخضراء

طبعا الاول بنجيب الملوخية ونقطفها عادى بالطريقة المعتادة وممكن نغسلها الاول

وبعدين نقطفها او زى ما انا عملت فى الحالة دى نقطفها على طول بدون غسيل 

وبعدين نضع كمية من الماء على النار تغلى ونضع فيها معلقة كبيرة بيكينج صودا

او ما تعرف ببيكربونات الصوديوم او الكربوناتو كلها اسماء لنفس المادة

بنحطة لية بقة علشان الملوخية تحتفظ باللون الاخضر الجميل 

ونترك الماء يغلى 

ثم نضع كل كمية الملوخية ودة طبعا كانك بتغسليها بالضبط

ويادوب تقليبة كدة ومباشرة نصفيها فى مصفاة تحت الحنفية ونفتح الماء

عليها لفترة لغاية ما تبرد وبكدة بنضمن انها نظيفة تماما

وبعدين نصفيها كويس ونضعها فى الخلاط انتم هاتحسوا

انها ماسكة فى بعضها عادى خالص 

شايفين لونها اخضر ازاى ونضربها فى الخلاط 

وبكدة نكون حصلنا على ملوخية جاهزة للتفريز وعند الحاجة اليها نطلعها

من الفريزر يا دوب خمس دقايق بس وعلى طول على الشوربة

كانك لسة عاملاها طازة

وبعدين نحفظها فى اكياس على قد الاكلة 

وهنا انا بحب اخلى الكيس مسطح علشان ما ياخدش مكان فى الفريزر 

وبالشكل دة احطهم على صينية مسطحة فى الفريزر لغاية

ما تجمد نشيل الصينية ونرصهم عادى خالص وبالهنا

** منوس ننوس **

( منى عبد المنعم )