طرق تخزين القلقاس الصحيحة مصورة من مطبخ شيف منى

القلقاس من الخضروات التى توجد فى الشتاء بكثرة وهوة يشبة البطاطس

ودة شكلة

طبعا بنشترية ونقشرة بالشكل دة

وزى ما احنا عارفين هوة فى كمية نشا كبيرة ومادة لزجة لة طريقتين فى التخزين

الطريقة الاولى
انك تقشرية وبعدين تمسكى فى ايدك فوطة نظيفة وتقطعية الى دوائر وتمسحى الدوائر بالفوطة وتقطعية مكعبات وبس كدة تشيلة على طول فى اكياس فى الفريزر تفاديا من غسلة
هى الطريقة سهلة لكن ليها عيب لما بتيجى تطبخية بيطلع كل النشا دة فى الشوربة وبتكون الشوربة عبارة عن نشا
انا عن نفسى مش بفضل الطريقة دى

الطريقة الثانية
ودى الاحلى طبعا بس حسب رغبتك
بعد التقشير نقطعة الى دوائر

ثم الى مكعبات صغيرة بهذا الشكل

ونملئ طبق كبير عميق بالماء ونضع فية ملح ونضع القلقاس فى الماء دة ونتركة عشر دقايق كدة 

ملاحظين شكل المية ابيضت ازاى من النشا اللى موجود فى القلقاس طبعا ناخدة بقة تحت الحنفية وندعكة بين راحتى اليد يعنى بين كفين ايدك كدة وبعدين تصفية وتسيبى الماء علية هتلاقى كل المادة اللزجة دى راحت خالص والنشا كلة نزل بالشكل دة 

نعبية فى اكياس بهذا الشكل

وبرضوا كالعادة انا بحب اضبط الكيس بشكل مربع حتى لا ياخد حيز ومكان فى الفريزر بالشكل دة طبعا لو حطيتة زى ما هوة كدة هياخد مكان كبير لكن كدة احسن بكتير

وعند الحاجة نطلعة على الشوربة مباشرة هوة مجمد واستمتعوا بأحلى قلقاس
وبألف صحة وهنا منوس ننوس (منى عبد المنعم)