طريقة عمل تورتة على شكل سيدة حامل بالصور من مطبخ منوس ننوس

الفكرة فى التورتة دى الشكل مش اكتر وهنا هانعملها على شكل حامل ممكن تستغربوها شوية بس حلوة ممكن تعتمدوا اى وصفة كيك تفضلونها وسبق وعملت لكم الكيك الاسفنجى فى وصفات سابقة كتير

لكن انا هنا عملته بنفس نوع التشوكليت كيك كنتاكى

وطبعا لان التورتة كبيرة انا عملت 3 مقادير من كيك الكنتاكى

وعلشان اعمل شكل الجسم بالبطن والصدر هعمل قالب مدور عبارة عن البطن وانا بصراحة استعملت حلة علشان تكون عميقة طبعا الاشكال دى بتكون ليها قوالب مخصصة بس انا مش متوفرة عندى فقلت اتصرف

ولعمل الصدر نحتاج الى 2 قالب اخر وانا استعملت قوالب الكريم كراميل

وايضا نحتاج الى قالب مستطيل لكى نثبت علية البطن والصدر ونقصة بنفس شكل الجسم ويشترط يكون مقاسة مناسب لمقاس القوالب الاخرى يعنى قبل ما نعمل نجيب القالب المستطيل ونضع فوقة القوالب الاخرى ونشوف مناسب فى الحجم ولة لا

وهنا شكل الكيك بعد الخبز

ودة القالب المستطيل بعد ما حطيت علية البطن والصدر وقصيتة بنفس شكل الجسم

يارب تكون الفكرة وضحت طبعا نخفق حوالى كيلو من الكريمة لانها كبيرة انا استعملت كريم شانتى دريم ابيض وحشيت بين الطبقات بعد ما قصيت البطن والصدر الى نصفين يعنى هتكون طبقات كيك وكريمة ونغلفها كلها بالكريمة من الخارج ونراعى ان تكون البطن مرتفعة عن الصدر مثل السيدة الحامل

وصلت الفكرة
طبعا ممكن نزين التورتة على اى شكل تفضلونة يعنى احنا هانعمل رسمة فستان انا اخترت انها تكون بيضاء ومنقطة بالبينك وفيونكة بينك تفصل بين الصدر والبطن طبعا لكم حرية التزين واستعملت كيس حلوانى بدون قمع لتشكيل الكريمة على هيئة نقاط

وطبعا من الجوانب من تحت خالص نحدد بالبينك او اللون الوردى يعنى وممكن نغير تبع نوع المولود لو ولد ممكن الازرق يعنى التزين مفتوح حسب الرغبة وهنا دة شكلها من الجوانب وكمان كتبت تهنئة لصديقتى الاضاءة مغيرة اللون الوردى شوية

وهنا من جانب تانى

وتقدم بالهنا يارب تكون عجبتكم
منوس ننوس
منى عبد المنعم