طريقة عمل تورتة على شكل بوكس هدايا بالصور والتفصيل مطبخ منوس ننوس

طريقة التورتة دى مختلفة شوية عن الطرق السابقة بس طبعا ممكن تعتمدوا اى طريقة من الطرق اللى انا شرحتهم قبل كدة انا بس بنوع لكم فى المقادير والطرق لتناسب جميع الاذواق

المقادير

على مرحلتين

اولا مقادير المرحلة الاولى

اقل من نصف كوب دقيق الكوب هو المج العادى بتاع الشاى اللى فى الصورة

6 بيضات + فانيليا وعصرة ليمون

ثلاثة ارباع سكر ناعم الحبيبات

معلقة كبيرة محسن جيل

ربع اواقل بشوية ماء عادى

مقادير المرحلة الثانية
كوب واقل من نصف بقليل دقيق
اقل من ربع كوب ماء
معلقة صغيرة باكينج بودر

هنا دة شكل المحسن

طريقة العمل
نضع مقادير المرحلة الاولى مع بعضها مع الخفق المستمر حوالى عشر دقائق

مع الخفق يصبح بهذا الشكل

نستمر اكتر .. دة شكلة بعد خفق عشر دقائق

ننخل الدقيق مع البودر ونضيفة بالتبادل مع الماء الخاص بالمرحلة الثانية

ونخلط بخفة من تحت لفوق

نصب الخليط فى صينة مقاس 26 مبطنة بورق زبدة

وندخلها الفرن حوالى نصف ساعة وهنا شكلها بعد ما استوت

نتركها تبرد تماما وتقسم الى نصفين وتسقى بالسفن او ماء كمبوت حسب الرغبة

هنا بقة نحضر الكريم شانتى انا هشرح لكم بالتفصيل عمل كريمة متماسكة وهشة فى نفس الوقت .. كتير سألونى عليها
هنا مثلا نضع 2كوب بودرة كريمة خام + 2 كوب سكر بودرة ناعم جدا ونخلطهم

نبدأ نضيف قطرات من الماء المثلج .. نبدأ بربع كوب ونخفق

نلاحظ شكلها كانها سايحة وبتلمع طبعا كدة لسة نزود ماء بس قطرات ونخفق كل ما زودنا الخفق كل ما ثقلت وهشت اكتر

مع استمرار الخفق علشان تلاحظو الفرق

هنا ابتدت الكريمة تهش بس ثقيلة جدا اضيف تانى نقط ماء مثلج والماء افضل بكتير من الحليب عن تجربة هنا شكلها النهائى الجاهز للاستعمال

يارب تكون الصورة وضحت والشرح سهل نكمل على بركة الله
بعد ما قسمت التورتة الى نصفين نضع طبقة من الكريمة وممكن اضافة اى فواكة حسب رغبتكم او مكسرات

ونضع الطبقة التانية من الكيك وهنا انا لونت الكريمة الى اجزاء وهاشكلها على شكل بوكس هدية هغلف التورتة بالكريمة من الجوانب فقط باللون الاصفر

اة نسيت اقولكم انا بحط التورتة على طبق التقديم وازينها بس بشرط اقطع قطع من ورق الزبدة واضعة على الاطراف تحت التورتة لكى نحافظ على نظافة الطبق وفى الاخر نسحبهم برفق
ثم اغلف التورتة من فوق باللون البينك وانزل بيهم على الجوانب كانة غطاء العلبة

هنا عملت الشرائط ونقاط على الجوانب بكريمة ملونة بالبنى

هعمل بقى وردات بلدى بالقمع هنا عملت احمر فى ابيض من الاطراف وعلشان نعمل الاطراف بالابيض نضع فى الكيس كمية بسيطة من الكريمة البيضاء ونمسحها فى الكيس كلة ونفتح الكيس نضع فى الوسط اللون الاخر الاحمر مثلا

بالشكل دة

واشكل الوردة على المسمار الخاص بها واشيلها بالمقص واضعها على التورتة بالتوزيع اللى تحبية بالشكل دة

ونكمل الورد الاصفر كمان ثم اوراق خضراء

وهنا شكلها بعد ما خلصت

تقدم بالهنا
لا تنسونى بصالح دعائكم
واتمنى انى اكون قدرت اشرح شرح وافى ومفصل وواضح للنقاط كلها
تحياتى لكم جميعا
منوس ننوس
منى عبد المنعم