عمل تورتة على شكل الكنبة او الصوفة بالصور والخطوات بطريقة الشيف منوس ننوس

التورتة دى كنت عملاها لأمى التانية والدة زوجى بمناسبة ميلادها قلت اعملها على شكل كنبة أو صوفة وعليها ست كبيرة قاعدة يارب تعجبكم ندخل على المقادير

المقادير

قارب مستطيل كبير

كيلو دقيق سبونج شيكولاتة

كوب ماء عادى

12 بيضة وفانيليا وعصرة ليمون

وممكن معلقتين كبار محسن جيل ممكن الاستغناء عنة

وهنحتاج ايضا اى جناش شيكولاتة

مقادير الجناش كوب كريمة خفق لبانى سائلة

و2 كوب شيكولاتة

تحضير الكريمة

نقوم بتسخين الكريمة على النار وتبشر الشيكولاتة، وأول ما تبدأ الكريمة تغلى نطفى النار ونضيف الشيكولاتة ونقلب وتترك لتانى يوم ايضا علشان تتقل وتكون كثيفة

طريقة العمل

نضرب جميع المقادير مع بعض حوالى ربع ساعة فى العجان الى ان نحصل على خليط كيك هش ورائع بيتضاعف المقدار مرة ونصف بهذا الشكل

نبطن صينة بزبدة وورق زبدة

نصب الخليط

يدخل فرن حار مشغل مسبقا بتاخد حوالى ساعة إلا ربع وده شكلها ناجحة جدا

نقلبها ونتركها تبرد تماما والافضل تترك فى الثلاجة لثانى يوم ليسهل التعامل معاها ودة شكلها بعد ما طلعتها من الصينة

هانقسمها الى 3 شرائح واحشى بين الطبقات كريم شانتى بالكاكاو

بالشكل دة ودة شكلها من الداخل

وهكذا مع باقى الطبقات

نساوى اطراف الكيك

نقسم الكيك الى نصفين ونترك نصف سليم والنصف الاخر نقسمة الثلث والثلثين

طبعا انا بتخيل شكل الكنبة ناخد النصف السليم هى دى قاعدة الكنبة والثلثين الطهى والثلث نقسمة 2 لليد الكنبة وأدهن جناش شيكولاتة والزق القطع وهنا شكل الجناش

بالشكل دة

طبعا انتى لما بتحطى إضبطى المقاسات براحتك يعنى لو حسيتى انها كبيرة ممكن تقطعى منها بعد كدة نغلفها كلها بالجناش وممكن كريم شانتى ونصيحة منى الجناش مش بيخلى عجينة السكر تسيح لو قعدت التورتة مدة طويلة فيعتبر الأفضل لو كانت مدة ترك التورتة كبيرة؛ لكن بالكريمة الشانتى بتكون الكيكة بالكتير تقعد يوم لان بعد كدة هيسيح الفندان دى معلومة للاستفادة

وهنا شكلها بعد ما غلفتها وطبعا واحنا بنغلف بنستعمل اسباتيولا الفرد المعدن ونضعها فى كوب ماء مغلى ونمسحها ونساوى بيها الجناش

وهنا من الجنب

هنا انا اشتريت عجينة السكر او الفندان جاهز لانها اسهل وانا لونت براحتى هنا بفرد الفندان البينك لتغليف الكنبة بالكامل

بفرده على مات سيلكون او على الرخامة مرشوشة بقليل من النشا

اخدها واضعها على الكنبة واساويها بالمكواة المخصوصة للفندان اذا توفرت او بكف اليد ونقص الزيادات

هنا دى اداة لعمل اشكال على الفندان انا عملت شرائط لتحديد الكنبة

بهذا الشكل وكمان اخدت من الكيك مربعات صغيرة وعملت 2 مخدة

وعملت مجسم او فيجر لست كبيرة على قدى كدة وهى طلعت شكل ابلة فاهيتا ههههههه

واة نسيت اقولكم عملت سجادة بألوان مختلفة اخدت اصبع من كل لون وصفيتهم جنب بعض وبعدين لفيتهم او برمتهم على بعض وفردتهم بالنشابة

بالشكل دة

وهنا شكل الكنبة من الجنب

وهنا قبل ما احط المجسم

وطبعا المجسم بحط لة cmc بودرة مخصوص لتنشيف العجينة لتصبح متماسكة وهنا شكلها من عدة اتجاهات

وهنا

وهنا

يارب تكون حازت على اعجابكم

مع تحياتى

منوس ننوس

منى عبد المنعم