طريقة عمل أجمل كوكيز التايجر بالتفصيل والصور فى المنزل للشيف منوس ننوس

دة بسكويت او كوكيز على شكل التايجر المحبب شكله لكثير من الناس وانا اولهم ودلوقتى هنتعرف على طريقة سهلة جدا لعمله والطعم خطير نبدأ بسم الله

المقادير والمكونات

كوب زبدة

2 بيضة +فانيليا

كوب سكر بودرة

معلقة كبيرة باكينج بودر

4 اكواب دقيق

طريقة العمل والتحضير

نخفق السكر مع الزبدة

الى ان تصبح هشة نضيف البيض والفانليا

ونخلط الى ان تصبح كريمى بالشكل دة

نضيف الدقيق والبودر نبدأ بـ 3 أكواب أول كوب من الدقيق ونزود حسب الحاجة لان انواع الدقيق مختلفة انا اخد معايا 4 اكواب ممكن ياخد منك اقل شوية حسب خامة الدقيق

نخلط الى ان نحصل على عجينة بسكويت ناعمة بالشكل دة

هنا ناخد جزء من العجين حوالى الربع ونقسمة الى 2 جزء نضع علية يا دوب على طرف المعلقة كاكاو علشان ياخد لون بنى فاتح وممكن قرفة حسب الرغبة
والجزء الاخر نغمقه بكاكاو اكتر بالشكل دة

نلف العجينة البيضاء فى نايلون ونضعها فى الثلاجة ترتاح شوية على ما نجهز جزء التايجر
نيجى بقة للتايجر نفرد اللون الغامق الى مستطيل

وناخد من اللون الفاتح نعمل اسطوانة ونضعها على الغامق بالشكل دة

ونلف الجزء الغامق عليها ونقص الزيادة ونضبطها اسطوانة وبعدين بين ايدك تعملى ليها طرف مثلث شوية الصورة التالية هتوضح الفكرة

نلفها ونضعها فى الفريزر متنسوش فى فريزر علشان نعرف نقطعها من غير ما الشكل يبوظ يا دوب تمسك
نيجى للجزء الابيض نفردة بسمك 1 سم على ورقة زبدة من فوق ومن تحت وممكن من فوق نايلون زى ما انا عملت بس لازم نعمل كدة ورق الزبدة بيريح كتير فى الشغل ومش بتحتاجى للدقيق تحت العجين وبتقدرى تشيلى البسكويت بسهولة يعنى مريح فى الاستخدام

وهنا شكل الاسطوانة وهى مثلثة علشان تفهوا قصدى وممكن تكون عشوائية شوية مفيش مشكلة انا عملت 2 اسطوانة بالعجين على فكرة

طبعا هى كدة جامدة نشيل الطرف ونقطعها بالسكينة شرايح رقيقة بالشكل دة

نشيل الكيس من فوق العجينة البيضة ونرص دوائر او اشكال التايجر بشكل عشوائى شمال يمين بميل شوية كدة

الى ان ننتهى بالشكل دة وبعدين نمشى على الاشكال براحة خالص يا دوب تكة بسيطة بالنشابة علشان تكون مسطحة

نحضر اى قطاعة تحبوها انا فضلت الدائرية علشان الشكل يكون واضح ونقطع البسكويت

ونشيل الزيادة ونرفع براحة ورقة الزبدة بإيد من تحت وايدك التانية تشيل البسكويت بخفة ونرصة فى صينة الفرن ويفضل صوانى قصيرة الحافة بدون اى دهان طبعا للصوانى

وهنا على صينية فاتحة

يخبز فى فرن حار لمدة عشر دقائق وهنا اللون الصح للكوكيز من تحت وخلو بالكم مش بياخد وقت

ودة شكلها لما استوت من فوق

يارب يكون عجبكم وتكون المعلومة وصلت بسهولة ولا تنسونى بصالح دعائكم
بالهنـــــا
منوس ننوس
منى عبد المنعم