طريقة عمل تورتة الطبيب بتغليف الجناش والفوندان بالصور والخطوات للشيف منوس ننوس

دى تورتة فانيليا بدقيق الاسبونج الجاهز الخاص بالتورتات من محلات مستلزمات الحلوانى ومحشية بكريم شانتى ومربى فراولة ومغلفة بجناش الشيكولاتة وطبقة من الفندان الابيض وإليكم الطريقة بالتفصيل

المقادير

نصف كيلو دقيق اسبونج

6 بيضات + فانيليا + معلقة كبيرة محسن جيل ان وجد

ونصف كوب ماء عادى

طريقة العمل

نخفق البيض مع الفانيليا والمحسن والماء مجرد خلط بسيط

الى ان يصبح بهذا الشكل

نضيف الدقيق الاسبونج ونخفق بالمضرب الكهربائى عادى خالص الحركة دى نعملها بس مع دقيق الاسبونج لانة بيحتوى على مواد رافعة ومش بيهبط

هنا فى اول مراحل الخفق حبيت تشوفوا الفرق

مع استمرار الخفق لونة بيبيض خاص وبيزيد وبيتقل بالشكل دة

وهنا بعد استمرار خفق لمدة 0 دقائق دى اخر مرحلة حبيت تشوفوا الفرق بنفسكم ولاحظا كمية الخليط فى العجان ارتفاعة يعنى

شايفين دة الشكل المطلوب وملاحظين المسافة الفارغة من العجان قلت عن الصورة اللى قبلها دة معناه انة بيزيد باستمرار الخفق واللون بيزيد فى البياض
هنا انا عملت المقدار دة على صينية مرتفعة الجوانب مقاس 24 او بمعنى اصح حلة زى الصينية بدون يد ودة شكلها

واللى فى الصورة دة ورق زبدة هابطن بية الصينة من الداخل من الجوانب ومن القاع انا بفضل كدة لسهولة الشغل

انا هنا طبعا مزودة فى ارتفاع الورق لانها هاتعلى وتزيد طبعا المقدار دة بيتعمل فى صينة 26 بس انا عملتة فى مقاس 24 علشان تكون مرتفعة زيادة

هنا صبينا الخليط فى الصينة ندخلها لمدة من 35 الى 40 دقيقة فى فرن حار ودة شكلها بعد ما استوت

من كتر ما عليت من فوق فيها شق من فوق عادى خالص انا هسويها بالسكينة وهنا انا رفعت الكيكة بالورق من الصينة بكل سهولة

وهنا بعد ما نضفت الجوانب وضبطت الكيكة ولانها مرتفعة بشكل حلو جدا قسمتها 3 مرات يعنى حصلت على اربع طبقات

وهنا حشيت كل طبقة بالكريم شانتى ومربى بسيط على مسافات

وهكذا الى ان ننتهى من الطبقات و اخر طبقة من الخارج نغلفها جناش وهنا طريقة الجناش بالتفصيل اضغطى على الطريقة التالية (طريقة تحضير جناش الشيكولاتة السهل فى المنزل بالصور والخطوات) بس انا هنا قللت كمية الشيكولاتة يعنى عملت 1 كريمة الى 1 ونصف شيكولاتة ودة شكل الجناش

انا هنا هاقولكم على طريقة من طرق عمل الشارب ايدج للكيكة بمعنى الحواف الحادة للكيك وتكون منتظمة ومتساوية

الطريقة هى اننا نحضر 2 بورد قاعدة للتورتة بالشكل دة واحدة هنسيبها زى ما هى وواحدة تانية هنغلفها بالنايلون

وهنحتاج أداة زى دى اسمها سكينة تسوية جوانب التورتة الاول هنحط طبقة من الجناش فوق التورتة بالشكل دة

نضع القاعدة اللى سيبناها تحت التورتة وتكون بنفس مقاس التورتة أو أكبر بسيط بس انا بصراحة عملتها نفس المقاس بس طلعت برضوا اكبر شوية

ونساويها

والبورد اللى غلفناة بالنايلون نضع علية طبقة جناش برضوا بالشكل دة

ونضعها فوق التورتة ونضبطها مع اللى تحت ونضع فى الجوانب جناش

بالشكل دة طبعا هنفضل نملى كل الجوانب لغاية ما تكون بنفس مستوى البورد وبالسكينة المعدن نساوى الزيادات الى ان تصبح بالشكل دة

نضعها فى الثلاجة خمس دقايق كدة تمسك شوية وبعدين نشيل البورد اللى فوق هنلاقى الجوانب متساوية والحافة من فوق مضبوطة  وعموما انا اول مرة اعمل الشارب ايدج بالطريقة دى قلت اجرب 

هنا بقى انا فردت فندان ابيض وغلفت بية التورتة وعملت سماعة وكتبت عليها بالفندان الاحمر فردتة وقطعت الحروف بالقطاعات بالشكل دة وبلزق الحروف على الفندان ب cmc مذوب فى ماء بيكون زى الصمغ ودة شكلها النهائى نسيت اصور الخطوات دى اندمجت ونسيت

ودة شكلها من الجنب

وهنا شكلها النهائى يارب اكون قدرت اوضح الفكرة ولا تنسونى بصالح دعائكم

منوس ننوس

منى عبد المنعم