بالصور طريقة كب كيك بوكيه الورد المنزلى بأرخص الأسعار للشيف منوس ننوس

انهاردة هقولكم على طريقة حلوة وسهلة وبإمكانيات البيت لعمل بوكية ورد من الكب كيك تنفع مناسبات وهدايا هاعرفكم ازاى نعمل الاستاند بتاع البوكية وازاى نعمل الكب كيك نبدأ بسم الله

نحتاج الى

اكواب بلاستيك وسعرها رخيص جدا انا هنا استعملت 7 اكواب فقط

مسدس شمع

اى قماش متواجد ستان او حتى ورق كوريشة

شريط ستان

قاعدة لتثبيت الاكواب ايا كانت كرتون او فوم

مقدار من الكب كيك

وكريم شانتى ملون

طريقة العمل

هنا نحضر الاكواب البلاستيك وندبسها مع بعض بالدباسة بالشكل دة

هنا بالشكل دة انا دبست ال7 اكواب مع بعض واحدة فى السنتر والباقى حولها وممكن طبعا نكبر البوكية باننا نعمل دور كمان يعنى صف كمان وهنا انا كان عندى قطعة فوم استعملتها كقاعدة ما اشترتش حاجة كانت عندى يعنى باقل امكانيات عندك ولو مش متواجد الفوم ممكن قاعدة اى تورتة كرتون مقوى عادى

هنا بعد ما جمعت الاكواب مع بعض لزقتهم بالمسدس دة

بس خليكم حذرين لانه بيكون سخن جدا ما نكترش علشان الاكواب ما تسيحش من السخونية

وده الستان اللى هاغلف الاستاند بيه تفننوا بقى براحتكم خالص انا عملتة فى السريع بالشكل دة

دة شكلة من جوة

هنا دة كب كيك ومقدارة كالتالى
3 كوب دقيق
معلقة كبيرة باكينج بودر ما يعادل باكو
5 بيضات كبيرة + فانيليا ونصف ليمونة
كوب زبدة لينة وليست سايحة
2 كوب سكر ناعم الحبيبات وليس بودرة
كوب وربع لبن رايب وممكن نخلية نصف الكمية حليب عادى ونصفة لبن رايب
دة شكل الكب كيك

وهنا دة كريم شانتى ملون باللون البينك
طبعا الكل بيسألنى ازاى بعمل الكريم شانتى متماسك كدة
انا بحط كوب بودرة كريم شانتى خام بدون سكر مع نصف كوب سكر بودرة ناعم مع نترة فانيليا
واقلبهم وابدأ اخفقهم بالمضرب الكهربائى بماء بارد وليس حليب وعن تجربة الماء بيدى نتيجة رائعة وطعمها خفيف جدا بابدا باقل من ربع كوب ماء واخفق وابدا ازود نقاط ماء على حسب الحاجة مع استمرار الخفق وكل ما نخفق اكتر كل ما نحصل على نتيجة افضل كتييييييييير

هنا دة شكل القمع اللى هانعمل بيه الوردة

انا قبل ما احط اللون شيلت معلقتين كريمة بيضاء وحطيتهم فى الاول فى الكيس وبعدين حطيت اللون البينك بالشكل دة

هنا انا حبيت اوريكم شكل الكب وهو فى الاستاند احنا بنحطه بس فى الاكواب بدون تثبيت

نمسك واحدة واحدة من الكب كيك ونبدا بعمل شكل الوردة البلدى الاول بنعمل زى البتلة فى المنتصف ثم الاوراق وعلى اليوتيوب فيديو يوضح طريقة تشكيها هاتكون بالشكل دة

وهكذا نلاحظ ان اللون الابيض كأنه محدد الاوراق بالشكل دة ودة شكلة النهائى

يارب اكون قدرت افيدكم بمعلومات مفيدة
بالف هنــــا
منوس ننوس
منى عبد المنعم