دى تورتة مجسمة على شكل سيارة BMW
عملتها بكيلو ونصف دقيق اسبونج مقسم على 3 صوانى مستطيلة 40 فى 25
نصف كيلو دقيق اسبونج فانيليا
6 بيضات +فانيليا وعصرة ليمون
معلقة صغيرة محسن جيل
نصف كوب ماء
طبعا انا هنا كررت المقدار دة 3 مرات
الطريقة سبق وشرحتها فى جميع التورتات وهى اسهل ما يكون تقدروا تشوفوا وصفات التورتات الأخرى فى قسم الكيك والكب كيك على مدونة عايزين ناكل للى أول مرة يتابعنا
نضع كل المقادير على بعض مرة واحدة ونخفق حوالى ربع ساعة الى ان يرتفع الخليط ويعلى ولونة يبيض بهذا الشكل
نصبها في الصنية وندخلها الفرن حوالى ثلث ساعة تستوى بهذا الشكل
ضبطت الكيك ونزعت كل الاطراف البنية وقسمتها شرائح
وحشيتها باسترى كريم مع كريم شانتى وقطع اوريو
وهكذا كل الطبقات فوق بعضها طبعا بعمل ارتفاع كويس يناسب شكل السيارة اللى هانعملها
وهنا انا رسمت جانب من السيارة والقاعدة على ورق علشان استخدمة كابترون نقص علية الكيك وكمان قصيت قاعدة من الكرتون بنفس الشكل علشان اضع عليها مجسم السيارة واشيلها بسهولة
هنا نضع الجزء دة على الكيك من فوق ونقص الكيك بكدة بنعمل مجسم للكيك ومن الجوانب نضع الورقة المرسومة ونبدأ ننحت
بنشيل الزيادات اللى فوق دى وبقاطعة مدورة نحدد مكان العجلات الاربعة
بالشكل دة ونغلفها بكريمة الزبدة
دى اول طبقة عملت كمان طبقة كريمة زبدة كمان علشان تكون ناعمة
وبعدين فردت عجينة سكر بيضاء وغلفت بيها السيارة
وحددت ملامح الوش للسيارة ونقص الزيادات ووضعتها على بورد كبير اسود بشكل الطريق
وبادوات الحفر نعمل خطوط تحديدات للابواب والعلامات على جسم السيارة وهنا انا عملت علامة السيارة
بالفندان الابيض والازرق الفاتح والاسود
بالشكل دة وحددتها بداست فضي وكتبت بالداست
عملت علامتين واحدة امامية وواحدة خلفية وعملت الاربع عجلات ببواقى الكيك معجون بجناش زى الكيك بوبس وغلفتة فندان اسود
ابدا افنش الكيك بوضع الزجاج والعلامات
بالشكل دة
وطبعا باقى التفاصيل وهنا صورة مجمعة للسيارة من جميع الجوانب
وهنا شكل اخر للصورة
يارب تعجبكم وتستفيدوا من الشرح مع تحياتى
منوس ننوس
منى عبد المنعم جاد
تعليقات
إرسال تعليق