مقدمة
كل عام وانتم بخير بمناسبة قرب حلول شهر رمضان الكريم اعاده الله علينا وعليكم بالخير واليمن والبركات
بما اننا فى شهر رمضان المفروض ما نضيعش وقت طويل فى المطبخ وياريت ما نسرف فى اكلات رمضان ونعتبر شهر رمضان من ناحية الاكل مثل باقى الشهور لانفرط فى الاكل
وما ننسى فضل افطار الصائم
ياريت كل واحد يعمل حسابة ولو بشئ بسيط يفطر صائم وليكن حارس او عامل او عابر سبيل
اما من ناحية العبادات فيجب مضاعفة العبادات من صلاة وقراءة قران حتى نفوز برضا الرحمن ونعتق من النار اللهم امين
بداية
انا نسقت إليكم بعض النصائح والاكلات السهلة اللى ممكن نجهزها قبل رمضان بوقت ونحتفظ بها فى الفريزر علشان يكون اليوم سهل وعندنا متسع من الوقت لممارسة العبادات
طبعا كل واحدة تكتب عندها فى ورقة متطلباتها الخاصة بشهر رمضان من ياميش ومكسرات ولحوم ودواجن بدون افراط حسب استخداماتنا واكيد كل واحدة بتكون عارفة هى مثلا هاتعزم كام مرة والافراد وكدة يعنى ممكن نكتب فى ورقة مثلاً هانعمل ايه فى العزومة الفلانية ومحتاجة ايه كدة يعنى ونجهز متطلباتها
الموضوع
طبعا من الاساسيات التمور بانواعها فيه الطرى وفيه المجفف انا بجيب الطرى لمشروب التمر بالحليب او للأكل ممكن لما نجيبه نفصصه نشيل النوى ونضعة فى اكياس فى الثلاجة لما نحتاج نستخدمة على طول
ملحوظة
طريقة الدخول للوصفات الموجودة من خلال الضغط على أسم الوصفة الزرقاء
اما المجفف بحتاجة فى الخشاف وكمان القراصيه والمشمشيه والتين نقطعهم صغير ونستعملهم فى الخشاف بيكونوا جاهزين مش بناخد وقت ودى طريقة عمل خشاف رمضان بالياميش
وبالنسبة للمكسرات انا اكتر حاجة بستعملها اللوز والزبيب والبندق وعين الجمل والمبشور اما الفستق والكاجو بستعملهم للتسالى طبعا لكم حرية الاختيار
ممكن نقشر اللوز بوضعة فى ماء ساخن ثم بارد وتقشيرة وممكن نحمصه بسيط ونحتفظ بية فى برطمان زجاج فى الثلاجة والبندق نحمصة فى الفرن ونقشرة وبرضوا نضعة فى برطمان زجاج اخر فى الثلاجة بكدة يكونوا جاهزين للاستخدام
وطبعا المشروبات المميزة زى مشروب عصير قمر الدين
ومشروب عصير التمر هندى
ومشروب العرقسوس المفيد
بالاضافة الى ان هناك بعض الاشياء لا غنى عنها مثلاً تسبيكة صوص الطماطم بنستخدمها فى اغلب الخضروات ممكن نعمل منها كمية ونحتفظ بيها فى اكياس فى الفريزر على قد الاكلة
وكمان اللحم المفروم سواء الابيض يعنى بدون طماطم او الاحمر بنحتاجة فى حشوات كتير مثل المكرونات او الكوسة بالبشاميل او السمبوسك وغيرها ممكن نجهز منها كمية ونفرزها فى اكياس وعند الحاجة نستخدمها مباشرة
وطبعا طبق الفول المدمس المميز اللى اغلب الناس بتفضل تتسحر علية لانة بيصمد فى البطن لمدة فلا نشعر بالجوع ممكن نجهزه بطريقتى ونحتفظ بيه فى الفريزر ايضا
وكمان فية اكلات سهلة جانبية من الاطباق المميزة وكلها ممكن نجهزها ونحتفظ بيها فى الفريزر منها السمبوسك سواء العجينة الجاهزة او المنزلية على طريقتى
ونوع اخر مثل كروكيت البطاطس أو كفتة البطاطس بيحبوها كبار وصغار
وفية كمان حاجة هاقولكم عليها وإن شاء الله تعجبكم طبعا كلنا عارفين القلقاس انا هنا بقى هاقولكم على طريقة حلوة قوى لـ خلطة خضرة القلقاس كمان نعملها ونحفظها فى الثلاجة
وكمان بالنسبة للدجاج فى طريقة الـ كوردون بلو روعة وممكن تجهزوها يا دوب على القلى وبرضوا نحتفظ بية فى الفريزر
وهناك بعض من اطباق اللحوم مثل تجهيز كفتة داوود باشا
او كفتة الرز المشهورة عندنا فى مصر
وكمان عرق اللحمة الباردة الرستو الرائع والمناسب للعزائم ممكن نتبلة ونجهزة ونحفظة بالتتبيلة فى الفريزر لحين الاستخدام نطلعة على طول على النار
وياسلام كمان على الكبة الشامى او السوري المقلية من هنا
واخر وصفة هى كيفية تجهيز الكرنب وتحضير اوراقه للمحشى الرائع
فى النهاية
الاصناف دى انا اختارتها لانها كلها ممكن فيها تجهيز مسبق واى شئ نحتفظ بية فى الفريزر نكتب الصنف عليها على استيكر علشان نكون عارفين اى اللى موجود فى كل كيس انا دائما بعمل كدة حتى فى اللحوم بكتب على كل كيس نوعة علشان لما احتاجة احصل علية بسهولة من الديب فريزر
وطبعا المدونة موجود فيها اصناف تانية كتير أخرى هتلاقوها بسهولة بإذن الله لو كتبتم اسم الوصفة فى شريط البحث اللى فوق .. تابعونى وان شاء الله هاتكونوا مبسوطين وأى أستفسار أو طلب أكلات معينة تانية انا موجودة سواء على شات المدونة - أو صفحة أطبــاق لذيــذة على الفيس بوك
يارب اكون قدرت افيدكم ببعض النصائح والامور الخاصة بتجهيزات الشهر الكريم
وياريت كل واحدة تقرأ الموضوع تدعى لي بظهر الغيب بصالح الدعاء
اللهم بلغنا رمضان يا كريم يا الله
وكل عام وانتم جميعا فى افضل حال والى الله اقرب وعلى طاعتة دوما
وفى الرابط الأزرق التالى أكلات السفرة الرمضانية يوم بيوم أضغطى للدخول
وفى الرابط الأزرق التالى أكلات السفرة الرمضانية يوم بيوم أضغطى للدخول
مع تحياتى للجميع
***منوس ننوس***
(منى عبد المنعم )
تعليقات
إرسال تعليق